Sapar barysynda qazastandyq delegasııa aldymen Qurmet alleıasyna taban tirep, Ázerbaıjan eliniń kósemi Geıdar Álıevtyń qabirine gúl shoqtaryn qoıdy.
Sondaı-aq Qazaqstan elinen kelgen meımandar Shehıdter alleıasyn aralap, «Máńgilik ot» memarıalyna gúl shoqtaryn qoıý arqyly Ázerbaıjannyń táýelsizdigi men aýmaq tutastyǵy jolynda sheıt ketken qaharmandardyń rýhyna taǵzym etti.
Sodan keıin general-leıtenant R.Jaqsylyqov bastaǵan delegasııasy músheleri aldymen Ázerbaıjan Ishki ister mınıstri general-polkovnık Ramıl Ýsýbovpen, keıin Ázerbaıjan Ishki ister mınıstriniń orynbasary – Ishki ásker Qolbasshysy general-leıtenant Shahın Mamedovpen kezdesý ótkizdi.
Kezdesý aıasynda Sh.Mamedov Qazaqstan Ulttyq ulany men Ázerbaıjan Ishki áskeri arasyndaǵy qarym-qatynastyń mańyzdylyǵyna toqtaldy. Sonymen qatar, osyndaı jyly shyraıly kezdesýler ekijaqty yntymaqtastyqty odan ári keńeıtýge yqpal etetinine senim bildirdi.
Taraptar eki eldiń ár túrli baǵyttaǵy ózara tıimdi yntymaqtystyǵy Ázerbaıjan men Qazaqstan múddelerine jumys isteıtinin tilge tıek etti. Sondaı-aq, meımandarǵa Ázerbaıjan Ishki áskerleriniń qurylymy, damýy jáne jaýyngerlik joly týraly baıandaldy.
General-leıtenant R.Jaqsylyqov óz kezeginde joǵary deńgeıli qabyldaýǵa alǵysyn bildirip, Qazaqstan men Ázerbaıjan arasyndaǵy baılanystyń, onyń ishinde quqyqtyq tártip pen qaýipsizdikti qamtamasyz etý máselesindegi qarym-qatynastardy nyǵaıtýdyń mańyzdylyǵyna tolqtaldy.
Ekijaqty kezdesý barysynda basqa da máseleler qarastyryldy. Sonyń ishinde, ázerbaıjandyq tarap jaýyngerleriniń qazaqstandyq «Kúreń beret» kııý quqyǵyna arnalǵan biliktilik synaqtaryna qatysýy, Arnaıy maqsattaǵy bólimshelerdi jaýyngerlik jáne ádistemelik daıyndaý ortalyǵynda oqytý, Taýlyq daıyndyqta tájirıbemen almasý men nesıelik baǵdarlamalar arqyly Ulttyq ulan jaýyngerleriniń baspana máselesin sheshýge baǵyttalǵan tájirıbesin zertteý máseleleri sóz etildi.
Sapar sońynda, qazaqstandyq delegasııa arnaıy-taktıkalyq oqý-jattyǵýǵa qatysyp, Ázerbaıjan Ishki áskeri Joǵary mektebin, Baký qalasyndaǵy áskerı bólimdi, Geıdar Álıev Ortalyǵyn, Ázerbaıjan eliniń tarıhı jáne mádenı eskertkishterin aralady.
Shara qorytyndysy boıynsha 2019-2020 jyldarǵa arnalǵan ekijaqty áskerı yntymaqtastyq Josparyn bekitý men jetildirý boıynsha jáne qurylýy tıis «Quqyq qorǵaý organdarynyń áskerı vedomstvalary jáne áskerı mártebesi bar quqyq qorǵaý organdarynyń Eýrazııalyq qaýymdastyǵy» uıymy aıasynda jumysty odan ári jalǵastyrý boıynsha kelisimder maquldandy.
