Negizi, bıylǵy «Qazaqstan arýy» baıqaýynda Atyraý qalasynyń turǵyny Alfııa Ersaıyn jeńimpaz atanǵan bolatyn. Degenmen, arý qyz bar bolǵany 16 jasta bolǵandyqtan, dúnıejúzi sulýlarynyń saıysyna qatysa almaıdy. Tek, kelesi jyly 17 jasqa tolǵanda ǵana ol «Álem arýy-2019» konkýrsynda elimizdiń atynan baq synaıtyn bolady.
Al Ekaterına Dvoreskaıaǵa keletin bolsaq, ol Qazaqstannyń 2018 jylǵy birinshi vıse-arýy bolǵandyqtan, álemdik lısenzııa talaptaryna saı, «Álem arýy-2018» konkýrsyna qatysý quqyǵyna ıe boldy.
Ekaterına Dvoreskaıa Temirtaý qalasynyń týmasy, osyndaǵy №1 gımnazııada oqyǵan. Qazir ol Abylaıhan atyndaǵy Halyqaralyq qatynastar jáne álem tilderi ýnıversıtetiniń 3-kýrs stýdenti. Sulý qyz sýda mánerlep júzýmen aınalysqan, qazir úlken tennıs jáne júgirýmen shuǵyldanady.
Aıta ketetin jaıt, Ekaterına Dvoreskaıa 2017 jyly «Qaraǵandy arýy» konkýrsynda jeńiske jetkeninde, júldege berilgen qarajatty qaladaǵy balalar úıleriniń birine syıǵa tartý etken bolatyn.
Álemniń 2018 jylǵy eń sulý qyzy aldymyzdaǵy jeltoqsan aıynyń 8-inde anyqtalatyn bolady.
Qaırat ÁBILDA,
«Egemen Qazaqstan»
QARAǴANDY
