Is-sharanyń ashylýynda Memlekettik hatshy Gúlshara Ábdiqalyqova Qazaqstan Prezıdenti Nursultan Nazarbaevtyń sezge qatysýshylarǵa arnalǵan quttyqtaýyn oqyp berdi. Onda: «Búginde Kásipodaqtar federasııasy – 2 mıllıondaı adamdy biriktirip otyrǵan elimizdegi asa iri qoǵamdyq uıym. Jumys istep jatqan 18 myńǵa jýyq bastaýysh kásipodaq uıymdary eńbek janjaldaryn sheshýge, eńbekshilerdiń quqyqtaryn qorǵaýǵa, eńbek sharttary men qaýipsizdigin jaqsartýǵa yqpal etip, jumys berýshiler men jumyskerler arasyndaǵy basty medıator bolyp otyr. Úshjaqty áleýmettik áriptestik modeli de óziniń tıimdiligin dáleldedi, onyń aıasynda jumys oryndaryn saqtaý jónindegi 115 myńnan astam memorandýmǵa qol qoıylǵan. Kásipodaqtardyń qatysýymen Halyqaralyq eńbek uıymynyń 24 konvensııasy ratıfıkasııalandy. Bul sharalardyń bári eńbekshilerdiń jumys jaǵdaıyn jaqsartyp, olardyń ómir súrý sapasyn arttyrýǵa baǵyttalǵan.
Kásipodaqtar federasııasy ózine eńbek salasyn jańǵyrtý jóninde jaýapkershilik ala otyryp, jumys berýshilermen birge qazaqstandyqtardyń Tórtinshi ónerkásiptik revolıýsııanyń jańa jaǵdaılaryna áleýmettik beıimdelýimen shuǵyldanatyn qozǵaýshy kúshke aınalýǵa tıis», – dep atap ótilgen.
Memleket basshysy qyzmettiń formalary men ádisteri qaıta qaralatynyna, sonymen birge eńbek naryǵynyń jahandyq transformasııasyn eskere otyryp, Qazaqstan kásipodaqtary qozǵalysyn odan ári damytýdyń jańa strategııasy ázirlenetinine senim bildirgen.
Qazaqstan Respýblıkasynyń Kásipodaqtar federasııasy 21 salalyq kásipodaqtan jáne 17 aýmaqtyq birlestikten turady.
