Depýtattar qaraýyna usynylǵan memlekettik satyp alý jáne kvazımemlekettik sektor sýbektileriniń satyp alý týraly zań jobasy birinshi oqylymda maquldandy.
Atalǵan zańnamalyq qujat boıynsha jumys tobynyń otyrystarynda depýtattar dempıngtik baǵalar usynýǵa jol bermeýge, otandyq óndirýshilerdi qoldaýǵa, qosalqy merdigerlikke berýdiń shekti kólemin úshten eki bólikten úshten bir bólikke deıin qysqartýǵa, ótpegen konkýrstyq rásimderdiń nátıjeleri boıynsha «bir kózden alý» tásilimen satyp alý negizderin joıýǵa baǵyttalǵan túzetýler engizdi
Sonymen qatar depýtattar áskerı qyzmetshilerdiń tamaqtanýyn qamtamasyz etý boıynsha kórsetiletin qyzmetterdi «Memlekettik satyp alý týraly» Zańnyń qoldanylý aıasynan shyǵarýǵa baǵyttalǵan túzetý engizgen bolatyn. Onyń ornyna mundaı kórsetiletin qyzmetterdi qazir mektepterde oqýshylardyń tamaqtanýyn qamtamasyz etý prosesinde jasalyp jatqandaı, erekshe tártippen satyp alý usynyldy.
Osy oraıda, Májilis Tóraǵasy N. Nyǵmatýlın bul usynystyń áskerı mekemelerge laıyqty ekenin alǵa tarta kelip:
- Biraq ta, bul jerde bir úlken másele bar. Ol dempıng máselesi. Mysaly, tájirıbe kórsetkendeı, birqatar aýrýhanalarda, mektepterde osy dempıng baǵamen alynǵan tamaqtarda eshqandaı sapa joq. Erteń áskerı mekemelerde osyndaı jaǵdaı bolýy múmkin. Sondyqtan, osy mekemelerge (mektepterge, aýrýhanalarǵa, áskerı oryndarǵa) eshqashan dempıng baǵany qoldanýǵa bolmaıdy,-dedi.
Sondaı-aq, Palata Spıkeri atalǵan áleýmettik nysandardy tamaqpen qamtamasyz etýde aldymen sapaǵa, odan keıin, baǵaǵa nazar aýdarý kerektigin basa aıtty.
Qorytyndy sózinde Májilis Tóraǵasy zań jobasy memlekettik satyp alýlardy jeńildetýge, olardyń tıimdiligin arttyrýǵa, sonymen birge, jemqorlyqqa jol bermeýge baǵyttalǵanyna toqtaldy.
-Úkimet músheleri, depýtattyq korpýs engizgen ózgerister qylmystardyń aldyn-alýǵa jáne osy suraqtardy talapqa saı jetildirýge zor yqpal etedi dep senemiz. Sondyqtan, búgingi aıtylǵan usynystardy nazarǵa ala otyryp, zań jobasyn ekinshi oqylymǵa jan-jaqty daıyndaýymyz kerek,-dedi N. Nyǵmatýlın.
Sonymen qatar otyrysta «Qazaqstan Respýblıkasynyń Úkimeti men Halyqaralyq Qyzyl Krest Komıtetiniń arasyndaǵy Qazaqstan Respýblıkasyndaǵy Halyqaralyq Qyzyl Krest Komıteti О́kildiginiń mártebesi, artyqshylyqtary jáne ımmýnıtetteri týraly kelisimdi ratıfıkasııalaý týraly» Zań jobasy talqylanyp, depýtattar tarapynan qoldaýǵa ıe boldy.
Palata otyrysynda Májilis 2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly 2014 jylǵy 23 jeltoqsanda qol qoıylǵan shartqa ózgeris engizý týraly hattamany ratıfıkasııalaý týraly Zańynyń jobasyn jumysqa alyp, «Standarttaý týraly» Senat engizgen tolyqtyrýlarmen kelisti. Jalpy otyrys sońynda halyq qalaýlylary birneshe depýtattyq saýaldar joldady. Olar B.Smaǵul, K. Absatırov, A. Smaǵulov, A. Platonov jáne Iý. Tımoshenko.
