Qazaqstan 2017 jyly 2017-2018 jyldarǵa arnalǵan «Týberkýlezdiń taralýy» («Tuberculosis incidence») faktory boıynsha Dúnıejúzilik ekonomıkalyq forýmynyń Ǵalamdyq básekege qabilettilik týraly esebine sáıkes, 2016 jylǵa qaraǵanda 2 pozısııaǵa jaqsaryp, 138 eldiń ishinen 90-shy orynǵa kóterilgen.
Qazir elimizde týberkýlezge qarsy epıdemıologııalyq jaǵdaı turaqty. Sońǵy 10 jylda ókpe aýrýyna shaldyǵý 2,4 esege tómendegen. 2017 jyly 100 myń adamǵa shaqqanda 52,2 naýqastan kelse, 2007 jyly 100 myń adamǵa shaqqanda 126,4 adam bolatyn. Osy aralyqta ólim-jitim kórsetkishi 6 esege tómendep, 100 myń adamǵa shaqqanda 3,0-ke jetti.
Der kezinde anyqtalǵan jaǵdaıda týberkýlezdi tolyq emdeýge bolady. Qazir Qazaqstanda Integrasııalanǵan baqylaý strategııasy júzege asyrylýda. Iаǵnı týberkýlez mıkobakterııasyn shyǵarmaıtyn jáne basqa adamdarǵa qaýip tóndirmeıtin naýqastar turǵylyqty jeri boıynsha emhanalarda ambýlatorııalyq negizde emdele alady. 2017 jyldyń qorytyndysy boıynsha ambýlatorııalyq emdeýdi bastaǵan týberkýlezben aýyratyndardyń úlesi 25,1 paıyzǵa artyp, 40,3 paıyzdy qurady. Ambýlatorlyq emdelýshilerge psıhologııalyq-áleýmettik kómek kórsetiledi.
Aınash ESALI,
«Egemen Qazaqstan»
ALMATY
