Aımaqtyń aıaýly ustazdaryn kásibı mereke qarasańynda Taldyqorǵan qalasyna jınap, saltanatty jaǵdaıda marapattaý jyl saıynǵy dástúrge aınalǵan. Ásirese, «Jyl muǵalimi-2018» atalymy boıynsha jeńimpaz bolǵan ustazǵa erekshe qurmet kórsetilip, avtokólik syıǵa beriledi. Bıyl bul qurmetke Jambyl aýdany Áset Beıseýov atyndaǵy jalpy bilim beretin mekteptiń bastaýysh synyp muǵalimi Alma Maqanova ıe boldy. Bilimi men biligin bala tárbıesine arnap, mektep tabyldyryǵyn alǵash attaǵan búldirshinge árip tanytýdy paryzym dep sanaıtyn Alma ustazdyń eńbegi janyp, Jetisýdyń «Jyl muǵalimi» atandy.
Jalpy, Almaty oblysynda bilim berý men bala tárbıesine laıyqty kóńil bólinip otyr. Ásirese, jas urpaqtyń tolyqqandy bilim alýyna barlyq jaǵdaı jasalǵan. Mysalǵa, jaqynda bastalǵan oqý jylyna oraı birden 7 mektep paıdalanýǵa berilse, jaqyn kúnderi oblysta taǵy 2 mektep esik ashady. Bul aımaqtaǵy bilim alýǵa degen suranystyń joǵary ekenin baıqatady. Onyń bir dálelin bıyl tuńǵysh ret mektep tabyldyryǵyn attaǵan oqýshylardyń jalpy sany 45 myńǵa jetkendiginen de kórýge bolady.
Al bilim men tárbıe berý isinde oblys ustazdary nátıjeli. Muǵalimderdiń kásibı merekesine oraı uıymdastyrylǵan saltanatty sharada eńbegi janǵan bir top muǵalimder ujymyna qurmet kórsetildi. Atap aıtqanda, oblystyń «Úzdik pedagogıkalyq ujymy» bolyp Taldyqorǵan qalasyndaǵy M.Aryn atyndaǵy bıznes jáne ekonomıka lıseıi tanylsa, «Úzdik aýyl mektebi» retinde Qarasaı aýdanynyń Jambyl atyndaǵy orta mektebi tanyldy. Munan bólek «Úzdik synyp jetekshisi», «Úzdik kásiptik bilim berý uıymy» atalymdary boıynsha da topjarǵandar anyqtalyp, aqshalaı syılyqpen marapattaldy.
Qalmahanbet MUQAMETQALI,
«Egemen Qazaqstan»
Almaty oblysy
