Árıne, aýyzdy qý shóppen súrtýden aýlaqpyz. Desek te ótken ǵasyrdyń toqsanynshy jyldary Almatydan arnaıy oqý ornyn bitirip, joldamamen kelgen Asqar, Shákızada Baıbatshanovtar sekildi jas mamandardyń muryndyq bolýymen qazaqtyń ejelden kele jatqan kóne dástúri qarańǵy túnde oınaǵan naızaǵaıdaı jarq ete qalyp, jalp etip óshken. Osylaısha ulttyq qundylyqtarǵa yntyzar jurtshylyqtyń shólirkegen kóńilin basa almaı opyndyrǵan. Ol kezderi esimderi elge belgisiz ákeli-balaly Sádireevter osyndaı dodalarda jalpaq jurtqa tanylyp, respýblıkada oblys namysyn asyrǵan bolatyn. «Kózden ketse de kóńilden ketpeıdi» demekshi, tamyrynan úzilińkirep qalǵan termeshiler baıqaýy qaıta jańǵyryp, sóz zergeri Ǵabıt Músirepov atyndaǵy shalǵaı aýdanda eńsesin tiktep, boıyn túzegeni qýantady.
«Rýhanı jańǵyrý» baǵdarlamasy aıasynda uıymdastyrylǵan «Tekti sózdiń tóresi –terme» baıqaýy oblystyq deńgeıde uıymdastyrylyp, mádenıet úıine jınalǵan kórermender erekshe áser aldy. О́ner dese, ishken asyn jerge qoıatyn aýdan ákimi Bolat Jumabekov memlekettik tildi damytý baǵytyndaǵy atqarylyp jatqan sharalarǵa keńinen toqtala kelip, til janashyrlaryn marapattady. Ortalyqtandyrylǵan aýrýhana «Til saıasatyn belsendi qoldaýshy mekeme» atalymy boıynsha jeńimpaz atandy. Kógalajar eldi mekeni «Memlekettik tildi qoldaýdaǵy úzdik aýyldyq okrýg» atalamyna ıe boldy. Aýdannyń qurmetti azamaty Imanbaı Tasmaǵambetov «Til janashyry» atalymyna laıyq dep tanyldy.
Budan keıin qalalyq, aýdandyq syndardan múdirmeı ótken termeshiler táýelsizdiktiń araıly tańy, dostyq, birlik, Alashordanyń ǵasyrlyq toıy, taǵy basqa sanalýan taqyryptardy keńinen tolǵap, jyrǵa qosty. Qazylar alqasy qatysýshylardyń sahnalyq mádenıetin, oryndaý sheberligin, til áýezdiligin basty nazarda ustady. Bas júlde biraýyzdan oblystyq fılarmonııanyń ánshisi Ǵalymjan Nurpeıisovke berildi. Ekinshi, úshinshi oryndardy Aqjar aýdanynyń ókili Nurqasym Hasenov pen aıyrtaýlyq Tańnur Álbosyn bólisti. Úshinshi oryn Qyzyljar aýdanynyń úkilep qosqan úmiti Damır Esbolovqa, «Kórermen kózaıymy» júldesi Esil aýdanynan kelgen Zeıin Muqııatqa buıyrdy.
О́mir ESQALI,
«Egemen Qazaqstan»
Soltústik Qazaqstan oblysy
