Taran aýdandyq máslıhatynyń turaqty komıssııasy músheleriniń birlesken otyrysynda bolshevık Lavrentıı Taran atyndaǵy aýdan men selo, selolyq okrýg atyn ózgertý máselesi talqylandy. Májiliske depýtattarmen birge qoǵamdyq jáne úkimettik emes uıymdar ókilderi, Taran selosynyń turǵyndary qatysty. Otyrysta aýdan ákimi Qýandyq Ispergenovtiń ótinishi boıynsha kún tártibine qoıylǵan aýdan atyn Beıimbet Maılın dep ózgertý týraly másele jóninde 14 adam sóıledi. Árıne Tarannyń halyq úshin kúresken tarıhı tulǵa ekeni týraly pikir de aıtylmaı qalǵan joq. Keńes ókimetin qurý jolynda qylysh sermegen tek Taran emes. Al sol jolda, Keńes ıdeologııasy, qyzyl ımperııa tusynda qazaqtyń kórmegeni bar ma? Belgili jazýshy, Memlekettik syılyqtyń laýreaty Tólen Ábdiktiń jerlesterimen kezdesýindegi: «Beıimbet Keńes ókimetin jyrlaǵan sııaqty kórinedi. Joq, olaı emes! Bı-aǵa Keńes ókimetin, sol qurylymdy mysqyldady» degen sózin eske alsaq, Bı-aǵanyń dáýir bıiginen qaraǵan kemeńger qalam ıesi ekenin túsinemiz, kimniń kim ekenin bilgendeı bolamyz. Tutas bir dáýir jazýshylary Beıimbet Maılın «shekpeninen shyqty».
Basqosýda aýdan Beıimbet Maılın atymen atalatynyna komıssııa músheleri biraýyzdan uıǵarym jasaǵannan keıin, aýdan ortalyǵy sanalatyn Taran selosynyń atyn ózgertý máselesi qaraldy. Osy otyrysqa qatysqan belgili aqyn Aqylbek Shaıahmet bul másele endi jerdiń atyn ózgertý emes, tarıhı ataýyn qaıta qalpyna keltirý bolyp sanalatynyn aıtty.
– Bul selo turǵan jer áý basta Dambar bolysynan bólinip shyqqan Áıet bolysyna qaraǵan. Odan keıin Keńes kezindegi saıasattyń, qonys aýdarýshylardyń yqpalymen «Vıktorov», odan keıingi jyldary «Taran» dep ataldy. Bastapqy aty «Áıet» dep atalǵan. Áıet – osy jerden aǵatyn Tobyldyń bir salasy, sýy mol ózen. Nurqan Ahmetbekovtiń «Sazdy Áıet, Saryarqada Túıemoınaq» dep jyrǵa qosatyny osy Áıet. Túıemoınaq ta jerdiń qoınaý-qoınaýymen túıeniń moınyndaı ıirilip aǵatyn ózenniń aty, qazirgi Denısov aýdany turǵan jer. Al Áıet sózi kisi aty bolýy da múmkin, jerdiń sazdy bolýyn bildirýi de yqtımal. Qazaqtyń osyndaı keremet sulý sózderi turǵanda daladan ataý izdedik-aý! – deıdi Aqylbek Qojauly.
Sonymen, otyrysta Taran selosynyń aty Áıet bolyp ózgertiletin boldy. Endi qujattar Respýblıkalyq onomastıka komıssııasyna jiberiledi.
Názıra JÁRIMBET,
«Egemen Qazaqstan»
Qostanaı oblysy,
Taran aýdany
