Aýdan ortalyǵynda júzege asqan osynaý jaǵymdy jańalyqty tamashalaýǵa kelgender sharany uıymdastyrýshylarǵa ózderiniń rızashylyqtaryn jaýdyryp jatty. Tipti, «kóshe kitaphanasy» degen atalýynyń ózi estigendi selt etkizerdeı eken. Tup – týra kóshe boıyna ornalasqan kóshe kitaphanasynyń negizi maqsaty kópshiliktiń kitap oqý jáne kitap almasý arqyly adamnyń jan dúnıesin baıytý, bilimge dańǵyl jol ashý, jańa ıdeıalarǵa kilt tabý, rýhanı qundylyqtarǵa qol jetkizý.
Bir ereksheligi, áldeneshe jerde ornalasqan kóshe kitaphanasy arqyly aýdan turǵyndarynyń ózderi kútken qoǵamdyq kólik kelgenshe kitapty oqýǵa, nemese ózimen birge unaǵan kitabyn alyp ketýine, keıin qaıtaryp berýine bolmasa ózge kitappen aýystyryp oqýǵa múmkindigi bar. Ári bul úshin eshqandaı qujat talap etilmeıdi de oqyrman bıleti de suralmaıdy. Barshasy kitap alǵan adamnyń jaýapkershiligine baılanysty.
Qazaly aýdany ákimi Murat Ergeshbaev jazýshy Ábish Kekilbaevtyń «Adamdy adam etken - kitap, adamzat etken kitaphana» degen danalyq sózin mysalǵa keltire otyryp, kóshe kitaphanasynyń jumysyna sáttilik tiledi. Murat Nálqojaulynyń osy sharaǵa ákim ǵana emes, oqyrman, aýdan turǵyny retinde qatysyp, janashyrlyq tanytýy, oqyrmandarmen erkin pikir alysýy, sýretke túsip, qarapaıymdylyq úrdisin saqtaýy da kópshilikke jyly áser qaldyrdy.
Oblys kóleminde(tipti elimiz boıynsha desekte artyq emes) tuńǵysh ret uıymdastyrylyp otyrǵan «kóshe kitaphanasynyń» bastamashysy aýdan ákiminiń orynbasary Álimjan Jarylqaǵanov, qoldaýshylary mádenıet jáne tilderdi damytý bóliminiń basshysy Aıgúl Laıyq, ortalyqtandyrylǵan kitaphanalar júıesiniń dırektory Indıra Nazarova bastaǵan kitaphanashylar bolǵanyn atap ketken jón.
«Kóshe kitaphanasynyń» ashylý saltanatynda aqyn Muńsyzbaı Áýbákirov óziniń jeke kitaphanasynan kitap syıǵa tarty.
Jumabek Tabynbaev,
Qazaly aýdany
