Forým jumysyna mınıstrlik ókilderi, Parlament depýtattary, memlekettik organdardyń, jergilikti atqarýshy organdardyń, kvazımemlekettik sektorlardyń, ǵylym jáne bıznestiń ókilderi qatysyp, paıymdy pikirleri men oramdy oılaryn ortaǵa saldy.Brokerlik oqıǵa formatynda ótken mańyzdy máslıhattyń maqsaty ǵylymı jáne ǵylymı-tehnıkalyq qyzmet nátıjelerin kommersııalandyrýǵa múddeli áleýetti seriktesterdi izdeý jáne olarmen baılanys ornatý boldy. Osy maqsatta Forým sheńberinde ǵylymı jáne ǵylymı-tehnıkalyq qyzmet nátıjelerin kommersııalandyrý jobalarynyń kórmesi uıymdastyrylyp, túrli jobalar tanystyryldy.
Álemdik deńgeıde qaraıtyn bolsaq, ǵylymǵa bólinetin qarjy bıýdjettiń 1 prosentinen tómen bolsa, ǵylym damymaıdy. Sondyqtan Elbasy kezinde ǵylymdy qarjylandyrýdy 1 prosentke jetkizý kerek degen tapsyrma bergen. Biraq ol áli kúnge deıin oryndalmaı kele jatyr. Sondyqtan búgingi forýmda da ǵalymdardyń kóterip jatqan suraǵy osy qarjynyń azdyǵy. Bul – birinshi másele.
Ekinshi másele «Ǵylym týraly» Zańǵa sáıkes jylda konkýrs ótkiziledi. Al kommersııalandyrý zańyna baılanysty bul konkýrstarda jańa joba kelip túsip jatsa, konkýrsty ótkize berý kerek.
Buryn ǵylymdy qarjylandyrýǵa tek bıýdjetten aqsha qosylyp jatqan bolsa, qazir atalǵan salanyń qarjysyna bıznes ókilderi óz úlesterin qosý ústinde. Bul bizdiń egemendik alǵannan bergi jaqsy tájirıbemiz ekenin atap ótken abzal», dedi Senat depýtaty Baqytjan Jumaǵulov.
Budan basqa forým sheńberinde kommersııalandyrýdy qoldaý quraldary, ǵylym, tehnıka jáne ınnovasııa boıynsha halyqaralyq granttyq baǵdarlamalarǵa qatysý mehanızmderi, tehnologııalyq kásipkerlik, jetekshi otandyq jáne halyqaralyq sarapshylardyń qatysýymen startap kompanııalardy damytý boıynsha trenıngter ótkizildi.
«Ǵylym qory» AQ basqarma tóraǵasy Ánýarbek Sultanǵazın forýmǵa qatysýshylarǵa ǵylymı jáne ǵylymı-tehnıkalyq qyzmet nátıjelerin kommersııalandyrylǵan jobalardy granttyq qarjylandyrýdy júzege asyrý nátıjelerin jáne Qazaqstanda kommersııalandyrýdy damytý boıynsha strategııalyq josparlar týraly baıandap berdi.
Negizi bul shara Memleket basshysy Nursultan Nazarbaevtyń 2015 jyldyń mamyr aıynda usynǵan «100 naqty qadam» Ult jospary baǵdarlamasynyń 64-qadamynyń negizinde uıymdastyryldy. «Ústimizdegi jylda «Ǵylym qorymen» 12 jańa ınnovasııalyq ónimder óndirisi iske qosyldy. Jaqynda «Skolkovo» Qorymen yntymaqtastyq boljamdar týrasynda túrli máseleler talqylandy. Kezdesýdiń nátıjesinde kommersııalandyrý jobalaryn qoldaý jáne olardy Qazaqstan men Reseı naryǵyna shyǵarýǵa baǵyttalǵan birlesken jumys týraly kelisimge qol qoıyldy», dedi ol.
Raýan QAIDAR,
«Egemen Qazaqstan»
