Sýretti túsirgen Erlan OMAR
Jýyrda qos mekemeniń birlesip uıymdastyrýymen baılanys salasy qyzmetkerleri arasynda ótkizilgen baıqaý jarııa etilip, «ózi – bir kúndik, sózi – myń kúndik» basylymdardyń taralýyna belsene atsalysqan jeńimpazdar marapattaldy. Seriktestik dırektory Jarasbaı Súleımenov jahandaný úrdisterine saı ozyq tehnologııalar engizilip, áleýmettik jeliler arqyly aqparattardy jedel jetkizýdiń túrli ádis-tásilderi qansha qoldanylsa da, Ahmet Baıtursynov «halyqtyń kózi, qulaǵy hám tili» dep baǵa bergen baspasózdiń bir salasy gazet ómirsheńdigin joǵaltpaıtynyn, qýatty úni, mán-mańyzy tómendemeıtinin, bul oraıda Elbasy saıasatyn, Úkimet tapsyrmalaryn, óńir jańalyqtaryn qalyń jurtshylyqqa jetkizý basty baǵdar bolyp qala beretinin jetkizdi.
Baılanys bólimshesi arasynda Esil aýdandyq toraby, aýyldar boıynsha Ivanovka eldi mekeni birinshi orynǵa laıyq dep tabyldy. Tımırıazev aýdanynda poshtashy bolyp jumys isteıtin Roza Qusaıynovanyń 118 adamdy gazetke jazdyrǵan jankeshti eńbegi joǵary baǵalandy. Jeńimpazdarǵa baǵaly syılyqtar tartý etildi.
«Qazposhta»AQ oblystyq fılıalynyń basshysy Bekjigit Bekberdıev gazet-jýrnaldarǵa jazylý naýqany bastalǵanyn, olardyń tırajyn kóbeıtýge septigin tıgizetin mundaı baıqaýlardyń dástúrge aınalatynyn málimdedi.
О́mir ESQALI,
«Egemen Qazaqstan»
Soltústik Qazaqstan oblysy
