Temir jol arýy men jigit sultany baıqaýy

«Qazaqstan temir joly» UK» AQ qabyrǵasynda ótken dástúrli «Jigit sultany» men «Temir jol arýy» baı­qaýy máresine jetti! Onda ádilqa­zy­lardyń sheshimimen, kópshiliktiń tań­daý-qalaýymen baı­­­qaýdyń jeńimpazy bolyp «segiz qyr­ly, bir syrly» saı­ypqyran ji­git Baǵlan Daýysbaev pen aqy­lyna kórki, bilimine biligi jaras­qan arý Kámshat Kákisheva tanyldy. Baǵlanǵa «Jigit sultany–2011» dıp­lomymen qatar, qazaqy bórik-sha­pan tartý etilse, Kámshatqa «Temir jol arýy – 2011» dıplomy tabys etilip, «Temir jol arýy – 2010» baı­qaýynyń ıegeri Nurgúl Baltaeva aý­yspaly arý tájin kıdirdi. Sondaı-aq, ulttyq naqyshta jasalyp, asyl tastarmen bezendirilgen qos bilezik, saqına-júzik, shashpaý-syrǵa, alqa bá­ri taza aq kúmisten jasalǵan áshe­keı­lerdi syıǵa tartty. Buǵan qosa, eki jeńimpazǵa da úlken-úlken teledıdarlar syıǵa berildi. Bıyl ulttyq eki baıqaýda uı­ym­das­tyrýshylar qatysýshylarǵa qoıy­lar sharttardy barynsha shı­ratqan bol­sa, óz kezeginde saıysqa túser jigitter men qyzdardyń bur­naǵy jyl­dardaǵydan anaǵurlym tııanaqty daı­yndalǵany aıdan anyq kórinip tur. «Jigit sultany» saıysyna 21 jigit túsip, óz óner­lerin synǵa salsa, «Temir jol arýy» baıqaýynda 23 arý óner jarysyna shyqty. Ejelgi qazaq arýlary salta­nat­ty keshter men toı-jıyndarda kıgen kı­imderdiń san úlgisi aqqýdaı taranǵan arýlardyń saltanatymen sahnaǵa shyq­ty. «Arýlar asyl jan­dar, shýaq bop shashylǵandar» dep, Muqaǵalı aqyn mynadaı keremet sulýlyqty kór­gende jyrlaǵan bolar degen oı keledi. Bul jyly kórkine aqyly saı arý tájin kııýge 23 kerim kerbez sulý áreket etti. Birinen biri ótken arý­lardyń qaı­sy­synyń baǵy janary beımálim. Olardyń júrgen júrisin, ár aıt­qan sózi men kórsetken ónerin bes birdeı qazy qas qaqpaı, qadala baqy­lap otyr. Baıqamaı bir ǵana shalys basqan qadam ońdyrmaı opyq jegizeri kádik. Sondyqtan arýlardyń bári qa­telik jibermeı, ónerin joǵary deń­geıde pash etýge baryn salyp-aq júr. Shynyn aıtý kerek, án shyrqap, bı bılegen, óleń oqyp, kúı tartqan qyz­dardyń óneri zaldy dýyldatyp jiberdi. О́z ónerlerin jurtshylyqqa pash etken 23 arýdyń arasynan aqylyna kórki saı eń kerimin tańdaý ádil­qazylarǵa da, kórermen qaýymǵa da ońaı soqpaǵany anyq. Desek te, «Temir jol arýy – 2011» baıqaýynyń jeńimpazy bol­ǵan Kám­shat Kákishevanyń óneri barshany tánti etti. Halqymyzdyń kórkemsóz sheberi, uly jazýshy­myz Ǵabıt Músirepovtiń «Qozy-Kór­pesh-Baıan sulý» tragedııa­lyq dra­masynyń sońǵy bóliminen qo­ıy­­lym jasaǵan Kámshat qyz sahnada teatr ártisterinen bir de kem túspedi desek asyra aıtqandyq emes. Drama úzindisi óte qysqa bolǵanymen óziniń maqsaty men dramalyq sıpatyn tolyq ashyp bere alǵanyna daý joq. Saıystyń taǵy bir tapsyrma­sy urshyq ıirý bol­dy. Bul kezde de Kámshat qyz qatar­lastaryn jeńip shyq­ty. Saı­ys sońynda 23 arýdyń arasynan ozyp shyqqan Temir jol arýy «Jolaý­­shylar tasymaly» AQ bu­qa­ralyq aqpa­rat quraly jáne syrt­qy baıla­nys­tar­men jumys júr­gizý bóliminiń bas mamany  Kámshat Ká­kisheva  óziniń pikirimen  bólisti: «Qazaq­stan temir joly sı­ıaqty ulttyq kompanııada «Atyna zaty saı» ulttyq salt-dástúrimizdi dá­rip­teıtin saıystyń bar ekenine qýanysh­ty­myn. Baıqaý joǵary dá­rejede ótti. Negizi mamandyǵym tilshi bolǵandyqtan ulty­myz­dyń salt-dástúrin bir adamdaı bilemin. Saıystyń bir tapsyrmasy boı­yn­sha  urshyq ıirý kerek boldy. Áj­em­niń tárbıesin kórgendikten ur­shyq ıirý men úshin  asa qıyn bolmady. Bul jeńis qazaq qyzy­nyń bolmysyn boı­y­ma sińire bilgen, ásirese ájemniń, ata-anamnyń jeńisi dep bilemin, olarǵa  sheksiz alǵysymdy aıtamyn.» Baıqaý maqsaty – qazaqtyń ult­tyq qundylyqtaryn qaıta jań­ǵyrtýmen birge jas talanttardy anyqtaý. Árbir qatysýshy ónerdiń, sporttyń san sa­lasy boıynsha zal toly jurtshy­lyq­tyń alǵysyna bólendi. Qatysýshy­lar­dyń túrli qoıylymdary men óner­lerine kó­rermender de tánti bolyp, jıi qol soǵyp, qoshemet kórsetip otyrdy. Baıqaýdyń barlyq qatysý­shy­lary «QTJ» UK» AQ arnaıy dıp­lom­dary men estelik syılyqtarmen ma­rapattaldy. Jeńimpazdarǵa týrıstik joldamalar, ulttyq kıimder jınaǵy, turmystyq tehnıkalar tabys etildi. Nurbaı ELMURATOV.