Eki komanda arasyndaǵy kezdesý bastalmaı turyp fýtbol sarapshylarynyń pikiri ekige bólindi. Biri chempıonaty jaǵynan, deńgeıi jaǵynan jáne halyqaralyq tájirıbesi jaǵynan joǵary «Renn» komandasy basym túsedi dese, ekinshileri «Astana» óz alańynda jeńile qoımaıdy, tym quryǵanda teń nátıjege qol jetkizedi desken bolatyn. Al tipti býkmekerlik keńseler match basynda-aq «Astana» jeńiske jetedi dep eseptegen.
Kezdesýge bir saǵat qalǵanda eki komandanyń bas bapkerleri negizgi quramnyń tizimin jarııalady. Grıgorıı Babaıan alańǵa birinshi mınýttan bastap vengrııalyq jartylaı qorǵaýshy Laslo Klıaınhaıslerdi emes, Qazaqstannyń bolashaq úmiti sanalǵan Baqtıer Zaınýtdınovti shyǵardy. Qalǵan fýtbolshylar negizgi quramdaǵy óz oryndaryn saqtap qalǵan. «Astana» bas bapkeri alańda shapshańdyǵymen kózge túsip, keıde eki fýtbolshynyń mindetin atqaratyn Laslony alańǵa nege shyǵarmaǵanyn bylaı túsindirdi. «Laslo keshegi jattyǵý kezinde ózin jaısyz sezingendikten, ony alańǵa shyǵaryp, táýekelge barǵymyz kelmedi».
Al qarsylas komanda sapynan negizgi quramda Fransııanyń bes dúrkin chempıony atanyp, bıyl ǵana PSJ komandasynan «Rennge» aýysqan Hatem ben Arfany kóre almadyq. Baspasóz máslıhatynda bas bapker Sabrı Lıamýshı «Ony Qazaqstanǵa ádeıi ákelgen joqpyz. О́ıtkeni oǵan demalys bergendi jón sanadyq. Onyń ústine bul matchtan keıin bizdi Fransııa chempıonatynda «Monakoǵa» qarsy mańyzdy kezdesý kútip tur», dedi mán-jaıdy túsindirip.
Endi az-kem «Astana» – «Renn» matchyna toqtalyp ótsek. Kezdesýdi elordalyqtar shabýylmen bastap, qarsylas komandaǵa qaraǵanda jeńiske yntasy bar ekenin birden baıqatty. Oıynnyń basynda-aq eki buryshtama jáne bir aıyp dobyn oryndap, Marın Tomasov pen Pedro Enrıke «Renn» fýtbolshylaryn azdap sastyrǵany bar. Biraq matchtyń 13-mınýtynda Mbaı Nıang alystan soqqy baǵyttap, dop Erıch qorǵaǵan qaqpanyń baǵanyna tıip keri serpildi. Taım aıaǵyna deıin oıyn orta deńgeıde órbip, eki komanda da aıtarlyqtaı qaýipti shabýyl uıymdastyra alǵan joq.
Ekinshi taımdy da «Astana» shabýylmen bastap, oıynnyń 65-mınýtynda aqyry degenine jetti. Kezekti buryshtama sátinde Marın Tomasov áýelete tamasha pas asyryp, dopqa birinshi jetken Baqtıer Zaınýtdınov basymen dopty qaqpaǵa top etkizdi. Esep – 1:0. Qaqpasyna gol ótkizip alǵan soń qonaqtar jıi shabýyldaýmen bolsa, bizdikiler osy esepke de «qanaǵat» degendeı qorǵanysqa myqtap «jatyp» aldy. «Renniń» shabýyly qaqpamyzǵa údeı túskeninen seskengen Babaıan alańǵa besinshi qorǵaýshy Iýrıı Logvınenkony shyǵardy. Match osy eseppen aıaqtalýyna eki komanda da ishteı kelisken syńaı tanytqan bolatyn. Alaıda oıynǵa qosylǵan
4 mınýttyń 1-mınýtynda qarsylastyń qateligin tıimdi paıdalanǵan Marın Tomasov esepti 2:0-ge jetkizdi. Osylaısha, «Astana» óz alańynda «Renndi» tize búktirdi.
Matchtan keıin eki komanda bas bapkeriniń pikirin tyńdadyq. Birinshi bolyp sóz alǵan «Renn» bapkeri fýtbolshylary dopqa jaqsy ıelik etkenimen, jeńiliske ushyraǵany qynjyltatynyn aıtty. «Bizdiń jeńilisimizge Qazaqstanǵa deıingi alys jol áser etti. Degenmen, «Astana» qolaıly sátterin jaqsy paıdalandy. Al bizdiń komandaǵa tepe-teńdik, senim, qorǵanys pen shabýyldaǵy nátıjelilik jetispedi», dedi ol.
Grıgorıı Babaıan óz shákirtterine kóńili toq ekenin jetkizdi. «Búkil Qazaqstandy «Astananyń jarqyn jeńisimen quttyqtaımyn! Oıyn sońyna deıin jankeshtilik tanytqan jigitterge erekshe alǵysymdy bildiremin. «Astana» óte keremet eýropalyq fýtbol atmosferasyn týǵyza aldy», dedi Grıgorıı Babaıan.
«Astana» – «Renn» matchynan keıin Chehııada toptaǵy ekinshi oıyn ótti. «Iаblones» komandasy óz alańynda Ýkraınanyń «Dınamo» klýbymen 2:2 esebimen tarqasyp, tórt upaıy bar «Astana» «K» tobynda kósh bastady. Endi elorda komandasy kelesi oıynyn 26 qazanda syrt alańda «Iаblones» klýbymen ótkizedi.
Álı BITО́RE,
«Egemen Qazaqstan»
