Sapardy elimizdiń syrtqy ekonomıkalyq basymdyqtaryn júzege asyrý jáne «Nurly jol» ınfraqurylymdyq damý memlekettik baǵdarlamasynyń ozyq jobalaryn ilgeriletý sheńberinde Almaty oblysy ákimdigi men «Qazaqstan temir joly» UK» AQ-men birlese otyryp, Syrtqy ister mınıstrligi uıymdastyrdy.
Prezıdent N. Nazarbaev Qazaqstannyń halqyna keshe ǵana jasaǵan joldaýynda búgingi jáne basqa da mindetterdi Úkimet pen SIM aldyna qoıǵany óte sımvolıkalyq bolyp tabylady.
Is-sharaǵa Eýropa, Azııa, Taıaý Shyǵys, Soltústik jáne Ońtústik Amerıka, afrıkalyq kontınent elshileri men dıpmıssııa ókilderi, sondaı-aq Dúnıejúzilik bank, ESKATO, EQYU sııaqty birqatar halyqaralyq jáne aımaqtyq uıymdar ókildikteriniń basshylary qatysty.
Syrtqy ister mınıstri Qaırat Ábdirahmanov sheteldik dıplomattardyń aldynda sóılegen sózinde «Nurly jol» baǵdarlamasyn júzege asyrý Qytaıdyń Shyǵys jaǵalaýy – Lıanıýngan portynan Qazaqstan men Qytaı shekarasyndaǵy qurǵaq port arqyly temirjol jáne avtokólik joldary júıesi arqyly Kaspıı teńizinen Eýropaǵa aparatyn ońtaıly logıstıkalyq tizbekpen qamtamasyz etkenin atap ótti. Atalǵan logıstıkalyq tizbek Transkaspıılik halyqaralyq dálizdiń konteınerlik mýltımodaldy baǵyttaryn baılanystyratyndyqtan Ortalyq Azııa, Qytaı, Kavkaz, Túrkııa jáne Eýropa elderiniń seriktesteri úshin asa tartymdy bolyp tabylady.
«Memleket basshysy Qazaqstandy Eýrazııanyń asa mańyzdy kóliktik-logıstıkalyq habyna aınaldyrý boıynsha úlken mindet qoıdy, osy maqsatta biz «Soltústik - Ońtústik», «Shyǵys - Batys», «Batys Eýropa - Batys Qytaı» dálizderiniń tolyqqandy jumys isteýin qamtamasyz etýdi, «Nurly jol» aıasyndaǵy jańa ekonomıkalyq saıasatty qytaılyq «Belbeý jáne Jol» bastamasymen úılestirýdi, sondaı-aq Qazaqstannyń óńirlerin «Qytaı – Iran» kontınentaralyq magıstraldarymen jáne Kavkaz ben Reseı arqyly ótetin dálizimen baılanystyrýdy kózdeımiz», - dedi Mınıstr.
Memleket basshysynyń «Tórtinshi ındýstrıaldy revolıýsııa jaǵdaıyndaǵy damýdyń jańa múmkindikteri» atty Joldaýyna sáıkes, Úkimet 2020 jyly tranzıttik tasymaldan túsetin jyl saıynǵy tabysty 5 mıllıard AQSh dollaryna deıin ulǵaıtýdy, konteınerlik tasymaldy 2 mıllıon JFM-ge (Jıyrma fýttyq mólsher – júk tasymaly quraldarynyń syıymdylyǵy ólsheminiń shartty birligi) jetkizýdi, áýe qatynasy arqyly jolaýshylar tasymalyn 4 esege ulǵaıtýdy jáne tranzıttik jolaýshylar aǵynyn 1,6 mıllıonǵa jetkizý josparlaýda.
Q. Ábdirahmanov byltyrǵy jyly Qazaqstan arqyly júk tasymaly 17%-ǵa ósip, 17 mıllıonǵa jýyq tonna quraǵanyn jáne 2015 jyldan bastap JIО́-degi kóliktik salanyń úlesi orta eseppen 8%-dan tómen bolmaǵanyn atap ótti. «Qorǵas» ShYHO-nyń sátti júzege asyrylýynyń arqasynda qazirgi kezde qazaq-ózbek shekarasynda osy ispettes ShYHO qurý máselesi qarastyrylýda.
«Qorǵastaǵy» transshekaralyq seriktestikti damytý Qazaqstan-Qytaı qarym-qatynastarynyń negizgi jobalarynyń biri bolyp tabylady. ShYHO óz aýmaǵynda Qazaqstan jáne Qytaı azamattarynyń, sondaı-aq bolý eline resmı saparmen iskerlik kezdesýlerge, Qazaqstanda, Qytaıda jáne TMD elderinde óndiriletin ónerkásiptik ónimdermen tanysýǵa, saýda-sattyq jáne saýda kelisimderin jasaýǵa, demalysqa kelgen úshinshi eldiń azamattarynyń erkin qozǵalýyn júrip-turýyn qamtamasyz etedi.
Syrtqy ister mınıstrliginiń baspasóz qyzmeti
