Bul alqaly basqosý Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty kúni keshegi Qazaqstan halqyna arnaǵan Joldaýyn talqylaýǵa arnaldy.
«Elbasy Nursultan Ábishuly Nazarbaevtyń bul Joldaýynda aıtylǵan barlyq tujyrymdar kásipodaqtar qyzmetiniń mazmunymen tikeleı qabysyp jatyr. Sondyqtan biz Joldaýdyń negizgi arqaýy bolyp tabylatyn qazaqstandyqtardyń ál-aýqatyn jaqsartý maqsatyndaǵy úrdisterdi jańǵyrtý jumystarynyń aldyńǵy qatarynan tabylýymyz kerek», dedi jınalystyń betashar sózinde Kásipodaqtar federasııasynyń tóraǵasy Baqytjan Ábdiraıymov. Adamnyń turmys deńgeıi aı saıyn alatyn jalaqysynyń mólsherine baılanysty ekendigin aıta kelip, ol Joldaýda: «Úkimetke 2019 jyldyń 1 qańtarynan bastap eń tómengi jalaqyny 1,5 ese ıaǵnı 28 myńnan 42 myńǵa deıin ósirýdi tapsyramyn. Bul barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyn tikeleı qamtıdy», dep atap kórsetilgen. О́zderińiz oılap qarańyzdar, eger ortasha eseppen otbasynda tórt adam bolatyndyǵyn eskersek, Elbasynyń Joldaýynda aıtylǵan osy bir ǵana másele elimizdiń 4 mıllıonǵa jýyq turǵynyn qamtıdy eken. Sonymen birge aldaǵy ýaqytta az qamtylǵan adamdardan alynatyn salyq deńgeıi de birshama tómendeıtin bolady. Munyń bári bizdiń Ata Zańymyzda atap kórsetilgen áleýmettik memleket qaǵıdalaryna barynsha sáıkes keledi», dedi Kásipodaqtar federasııasynyń tóraǵasy.
Odan ári ol óz sózinde budan bylaı eń tómengi jalaqy eń tómengi kúnkóris shegine baılanysty bolmaıtyndyǵyn, eń tómengi jalaqynyń jańa mólsheri búkil ekonomıka aýmaǵyndaǵy eńbekaqy ósimin arttyratyn ıgi qozǵaýshy kúshke aınalatynyn atap kórsetti. Sonymen birge Kásipodaqtar federasııasynyń tóraǵasy bul tarıhı qujattyń elimizdiń orta jáne shaǵyn bıznes salasyn ekpindi damytýǵa tyń serpin beretindigin de tilge tıek etti.
Qazaqstan Respýblıkasy Kásipodaqtar federasııasynyń basqosýynda sóz alǵan Aýyl sharýashylyǵy qyzmetkerleri salalyq kásipodaǵynyń tóraǵasy Egor Kappel Memleket basshysynyń atalǵan Joldaýynyń birinshi kezekte aýyl turǵyndarynyń ál-aýqatyn jaqsartýǵa arnalǵan tarıhı qujat ekendigin tilge tıek etti. Elbasy aýyl kásipkerlerine sharýashylyq júrgizýdiń jańa daǵdylaryn úıretýdiń mańyzdylyǵyn atap kórsete kelip, Úkimetke aldaǵy úsh jyl ishinde osy maqsattarǵa jyl saıyn qosymsha keminde 100 mıllıard teńge qarastyrýdy tapsyrdy. Bul shyn máninde aýyl turǵyndarynyń eńbekpen qamtylýyn jaqsartýdyń jańa bir tıimdi joly ekendigi daýsyz.
Memleket basshysynyń Qazaqstan halqyna arnaǵan Joldaýyn talqylaýǵa arnalǵan elimiz kásipodaqtarynyń alqaly basqosýynda Mádenıet, sport jáne aqparat qyzmetkerleri salalyq kásipodaǵynyń tóraıymy Svetlana Imanqulova, Astana qalasy Kásipodaqtar ortalyǵynyń tóraǵasy Tastanbek Esentaev jáne basqalar sóz sóılep, Qazaqstan halqynyń ál-aýqatyn jaqsartýǵa baılanysty Joldaýda atap kórsetilgen negizgi tujyrymdardy tilge tıek etti. Jınalysqa qatysýshylar Elbasynyń Joldaýynda kóterilgen kókeıkesti máselelerin naqty is júzine asyrýda elimizdiń kásiptik odaqtar salasynyń qyzmetkerleri barynsha belsendilik tanytatyndyǵyn biraýyzdan atap kórsetti.
Jylqybaı JAǴYPARULY,
«Egemen Qazaqstan»
