– О́ńirde mundaı resýrstyq ortalyqtyń ashylýy – bizdiń ustazdar qaýymy úshin úlken kómek, zor múmkindik. Endi olar ózderiniń teorııalyq bilimin naqty is júzinde paıdalanyp, oqytý úderinde ozyq tehnologııany qoldanýdy úırenedi, ǵylym-bilimniń jańa jetistikteri mektep ómirine enedi. Osy jerde ustazdar bir birimen tájirıbe almasady. Sondaı-aq munda sabaq berý úlgilerin beınejazbaǵa túsirip, aýyl mektepterine taratýǵa da múmkindik bar. Sıfrlyq resýrstardy mektep ómirine batyl engizý – búgingi kúnniń basty talaby bolyp otyr, - dedi ortalyqtyń ashylý saltanatyna arnaıy kelgen Batys Qazaqstan oblysy ákiminiń orynbasary Ǵabıdolla Ospanqulov.
Oraldaǵy resýrstyq ortalyq – bilim salasyn damytýshy ınnovasııalyq Bilim Media Group kompanııasynyń Aq Jaıyq ustazdaryna merekelik tartýy boldy. Osylaısha óńir muǵalimderi bilimland.kz respýblıkalyq bilim júıesine qosyldy.
2011 jyly qurylǵan Bilim Media Group kompanııasy búginge deıin 40 myńnan astam beınesabaq, 250 myńnan asa bilim berýdi jańartý tehnologııasyn taratqan. Kompanııanyń resýrstyq ortalyqtary buǵan deıin Astana, Taldyqorǵan, Shymkent qalalarynda ashylǵan eken.
– Jańa ortalyqta muǵalimder aqparattandyrý ortalyǵy men oblystyq ádistemelik kabınet túzgen keste boıynsha bilim jetildiretin bolady. Oǵan qosa osy jerde mektep oqýshylarynyń ata-analaryna arnalǵan semınarlar da ótkizýdi josparlap otyrmyz. Jańa tehnologııanyń kómegimen bizdiń muǵalimder ustazdyq sheberligin burynǵydan da arttyratyny sózsiz, - deıdi Batys Qazaqstan bilim basqarmasynyń basshysy Sholpan Qadyrova.
Qazbek QUTTYMURATULY,
«Egemen Qazaqstan»
Batys Qazaqstan
