Memlekettik densaýlyq saqtaý uıymdaryna korporatıvtik basqarýdy engizýdi kózdeıtin buıryq boıynsha oblystardyń jáne Astana, Almaty, Shymkent qalalarynyń Densaýlyq saqtaý basqarmalary janynan 1 qarashadan bastap Bıznes keńester qurylmaq. Mamandar bul uıymnyń medısınadaǵy salalyq máselelerdi sheshýde mańyzy zor ekenin aıtady.
«О́ńirlerdegi tegin medısınalyq kómek alý, áleýmettik medısınalyq saqtandyrý, tegin medısınalyq kómek sheńberindegi dári-dármektermen qamtamasyz etý boıynsha týyndaıtyn usynys-pikirler men máseleler osy Bıznes keńesteriniń otyrystarynda qaralady. Buǵan deıin mınıstrlik janynan qurylǵan Bıznes keńes quramyna úkimettik emes uıymdardyń músheleri qatysa otyryp, medısına salasyndaǵy keıbir máselelerdiń kúrmeýin sheshken bolatyn. Sol tájirıbe ary qaraı óńirlerde jalǵaspaq», dedi DSM «Densaýlyq saqtaýdy damytý respýblıkalyq ortalyǵy» ShJQ RMK menedjment ortalyǵy Korporatıvtyq basqarý bólimniń basshysy Mırat Jumakárimov.
Mırat Ábdikárimulynyń aıtýynsha Bıznes keńes qurylǵan soń ereje bekitilip, jospar jasalady. Josparǵa densaýlyq saqtaý salasy boıynsha ár sala ókilderinen kelip túsken óńirdiń asa mańyzdy máseleleri qamtylady.
Sondaı-aq osy buıryqqa sáıkes mınıstr E.Birtanov memlekettik densaýlyq saqtaý uıymdarynda qurylǵan Baıqaý keńesteriniń quramyndaǵy múshelerdiń keminde 30%-i úkimettik emes uıymdardyń, bıznes salasynyń jáne buqaralyq aqparat quraldarynyń ókilderi bolýy kerektigin belgiledi.
«Elimiz damyǵan 30 eldiń qataryna kirý úshin Ekonomıkalyq yntymaqtastyq jáne damý uıymynyń (EYDU) sanattary men qaǵıdattaryn engizýde. Oǵan korporatıvtik basqarý da jatady. Onyń basty qaǵıdattarynyń biri – ashyqtyq. Baıqaý keńesi quramynyń 30 prosentin úkimettik emes uıymdardan, bıznes jáne BAQ ókilderinen etip belgileý arqyly Baıqaý keńesi jumysyn halyqqa ashyq, qoǵamǵa belgili etip kórsetýge múmkindik alamyz. Sonymen qatar kásiporyndar óz úlesiniń qandaı ekenin baǵalaı alady. Osylaısha keńes quramynda basqa da salanyń mamandary bolǵan soń onda paraqorlyq, ózderiniń oıyn tyqpalaý sııaqty keleńsizdikter bolmaıdy. Mysaly, Brıtanııa Ulttyq densaýlyq saqtaý júıesi memlekettik klınıkalarynyń korporatıvtik basqarý ınstıtýttary EYDU-nyń basqarýshy qaǵıdattaryna sáıkes qurylymdalǵan jáne sol boıynsha jumys isteıdi», deıdi Mırat Jumakárimov.
Bıznes keńesi men Baıqaý keńesiniń aıyrmashylyǵyna toqtalǵan resmı ókil aldyńǵysy óńirlik deńgeıdegi máseleniń durys sheshilýine septigin tıgizse, ekinshisi kásiporynnyń strategııalyq damýyna jol ashatynyn aıtady. «Astana qalasynda Baıqaý keńesi engizilgen 29 medısınalyq uıym bar eken. Olardyń barlyǵyna basqa sala mamandaryn tartý kózdelip otyr», deıdi ol.
Aıta keteıik, bul buıryq Prezıdent Nursultan Nazarbaevtyń 2015 jylǵy 20 mamyrdaǵy «Ult Jospary – 100 naqty qadam» atty baǵdarlamasynyń 81-qadamyna, Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyna sáıkes qabyldanyp otyr.
Maıgúl SULTAN,
«Egemen Qazaqstan»
