Sol tapsyrmaǵa sáıkes, ıpotekalyq baǵdarlamanyń qatysýshylary úshin alǵashqy jarnany arzandatý maqsatynda 50 myńǵa jýyq turǵyn úı sertıfıkattary shyǵarylatyn boldy. Qarajat jergilikti bıýdjetten jeńildikti ıpoteka úshin bastapqy jarnany sýbsıdııalaý maqsatyndaǵy qarjy esebimen júzege asyrylady. «Baspana» ıpotekalyq uıymynyń habarlaýynsha, turǵyndarǵa jyl sońyna deıin 10 myńdaı sertıfıkat tapsyrylady.
«7-20-25» sertıfıkatynyń ortasha nomınaly 1 mln teńgeni quraıdy. Osy maqsatta, jergilikti atqarýshy organdar tarapynan turǵyndardyń baǵdarlamaǵa qatysýyn yntalandyrý úshin kem degende 50 mlrd teńge bólinýi kózdelip otyr.
«7-20-25» sertıfıkattary bıýdjettik sala qyzmetkerleri úshin alǵashqy jarnany edáýir jeńildetý maqsatynda ázirlenip otyr. Sertıfıkattardy qala jáne oblys ákimdikteri úlestiredi. Memleket basshysy atap ótkendeı, mundaı turǵyn úı sertıfıkattaryn berý muǵalimder, dárigerler, polısııa qyzmetkerleri jáne basqa da jergilikti óńirlerge qajetti mamandyq ıeleri úshin ıpotekanyń qoljetimdiligin arttyra túspek. Biz «Nur Otan» partııasynyń qoldaýymen alǵashqy jarnany azaıtý boıynsha jumystardy bastap kettik. Osy aptadan bastap ár óńirde «7-20-25» sertıfıkattaryn bere bastaımyz», deıdi «Baspana» ıpotekalyq uıymynyń basshysy Qaırat Altynbekov.
Qurmanáli QALMAHAN,
«Egemen Qazaqstan»
