Qazaqstan Respýblıkasy Prezıdenti Nursultan Nazarbaevtyń halyqqa kezekti Joldaýyna erekshe den qoıyp, muqııat tyńdap shyqtyq. Mazmuny elimizdiń áleýmettik-ekonomıkalyq damý baǵytynyń ózekti máselelerine arnalǵan bul qundy qujatta urpaq tárbıesi men muǵalimder qaýymyna qatysty da óte baǵaly oılar men tyń tujyrymdar aıtyldy. Atap aıtqanda, bizdi Memleket basshysynyń kelesi jyly «Pedagog mártebesi týraly» zań qabyldaýy kerektigi týraly baılamy aıryqsha qýantty.
Elbasy óziniń sózinde atalǵan zańnyń muǵalimder men mektepke deıingi mekemeler qyzmetkerlerin jemisti eńbek etýge yntalandyratyn barlyq tetikterdi qarastyrýy tıis ekenin atap kórsetti. Munyń yqpalynda oqý ornyndaǵy barlyq júktemeni qysqartyp, qyzmetten tys tekseristerden aryltý tapsyryldy. Sonyń ishinde muǵalimderdi eldi mekenderdegi barlyq jumystarǵa qoǵamdyq negizde tarta berýdi toqtatý kerektigi ashyp aıtyldy. Iá, barlyq jerde saılaýdy ótkizetin, onyń barlyq qıyndyqtaryn kóterip, úgit-nasıhat naýqanyn júrgizýshi bolyp tabylatyn muǵalimder ekeni de ras.
Prezıdent óz sózinde endi saladaǵy biliktilik talaptary, oqytý ádisnamasy, tárbıeshiler men balabaqshadaǵy ózge de qyzmetkerlerdiń eńbegin tóleý júıesi qaıta qaralatynyn alǵa tartty. Sondaı-aq Joldaý joldarynan biz bıyl Bilim jáne ǵylym mınıstrliginiń ákimdiktermen birlese otyryp, tıisti Jol kartasyn ázirleıtinin de bildik. Munyń bári óskeleń urpaqtyń bilimi men tárbıesin jaqsarta túsýge baǵyttalǵan naqty qadamdardyń biri ekeni anyq.
Joldaý arqyly biz, sondaı-aq respýblıkada Nazarbaev Ýnıversıtet sekildi taǵy bir irgeli joǵary oqý orny ashylǵaly jatqanynan habardar boldyq.
Nursultan Nazarbaev sonymen birge joǵary oqý oryndarynda kezdesip qalatyn sybaılas jemqorlyq derekteri jóninde aıtyp ótti. Prezıdenttiń aıtýynsha, tek naryqqa tótep bere alatyn joǵary oqý oryndary ǵana qalýy kerek. Olardyń arasyndaǵy báseke taza kásibı biliktilik turǵysynda júrýi tıis. «Jahandyq ýnıversıtettermen yntymaqtastyqty jalǵastyryp, Nazarbaev Ýnıversıtettiń tájirıbesi boıynsha álemniń úzdik top-menedjerlerin tartý kerek», – dedi Elbasy.
Prezıdent Joldaýda Úkimetke bilim men ǵylymǵa qarjylandyrýdy arttyrýdy da júktedi. Bizde qazir ǵylymnyń aqsap turǵany ras. Muny Elbasy dóp basyp aıtty. Al álemdegi damyǵan elderdiń kóshinen qalmaı júrý úshin eń aldymen ǵylymdy damytýǵa týra keledi. Damý qashanda ǵylymǵa baılanysty. «Bes jyldyń barysynda bilimge, ǵylymǵa jáne densaýlyq saqtaýǵa arnalǵan shyǵystardy barlyq kózderden eldiń ishki jalpy óniminiń 10 prosentke deıin jetkizý kerek» degen tujyrymdy Memleket basshysy sondyqtan da alǵa tartty.
Qoryta aıtqanda, Prezıdent óziniń Joldaýynda damýdyń tetigi de, negizi de ǵylymda, bilimdi urpaqta jatqanyn taıǵa tańba basqandaı etip aıtyp berdi.
Jańagúl SULTANOVA,
Qazaq memlekettik qyzdar pedagogıkalyq ýnıversıteti departamentiniń dırektory,
PhD doktor
