Festıval barysynda Aqmola oblystyq «KÓKSHE» telearnasynyń «Rodına» agrofırmasy» jaýapkershiligi shekteýli seriktestiginiń dırektory, Qazaqstannyń Eńbek Eri Ivan Adamovıch Saýer týraly túsirgen «Rojdennyı, byt ýspeshnym!» teleocherki júldeli orynǵa ıe bolyp, arnaıy dıplommen marapattaldy. Jas jýrnalıst Iýrıı Oberdıenkonyń teleshyǵarmasynda esimi elimizge keńinen tanymal osy bir isker basshynyń aýyl sharýashylyǵy salasyndaǵy eren eńbegi týraly áserli áńgime órbip, áıgili agroónerkásip kesheniniń búgingi tynys-tirshiligi sátti beınelenedi.
Jyl saıyn TMD elderi jáne sheteldik televızııalyq kompanııalar arasynda ótkiziletin halyqaralyq baıqaý bıyl tuńǵysh ret Tashkent qalasynda uıymdastyryldy. Baıqaýǵa 12 elden 13 shyǵarmashylyq jumys iriktelip alynǵan. Solardyń ishinde top jaryp, baıqaý júldegerleri qatarynan kóriný jalǵyz «KÓKSHE» telearnasy emes, búkil aqmolalyq buqaralyq aqparat quraldary úshin úlken mereı dep bilemiz. Júlde qutty bolsyn, qymbatty áriptester!
Baıqal BAIÁDIL,
«Egemen Qazaqstan»
Aqmola oblysy
