Bıyl Jambyl óńirindegi jetekshi oqý oryny M.H.Dýlatı atyndaǵy Taraz Memlekettik ýnıversıtetiniń qurylǵanyna 60 jyl tolyp otyr. Osydan 60 jyl buryn Áýlıeata óńirinde Qazaq hımııa-tehnologııalyq ınstıtýtynyń Jambyl fılıaly ashylǵan bolatyn. Ol 1963 jyly jeńil jáne tamaq ónerkásibi Jambyl tehnologııalyq ınstıtýtyna aınaldy. Al 1962 jyly gıdromelıoratıvtik-qurylys ınstıtýty jáne 1996 jyly Jambyl ýnıversıeti quryldy. Atalǵan úsh oqý ornynyń birigýi nátıjesinde bul joǵary oqý orny táýelsizdik jyldary M.H.Dýlatı atyndaǵy Taraz Memlekettik ýnıversıteti bolyp qalyptasty. Osy ýaqytqa deıin elimizdiń damýyna ózindik úles qosyp júrgen talaı azamattardy túletken ýnıversıtet búginde 60-tan astam mamandyq boıynsha kadrlar daıyndaıdy.
Eki kúnge jalǵasqan mereıtoı aıasynda elimizge tanymal ǵalymdardyń qatysýymen halyqaralyq konferensııalar men túrli basqosýlar uıymdastyryldy. Ásirese konferensııaǵa qatysýshylar M.H.Dýlatı tóńireginde pikir almasty. Sonymen qatar, mereıtoı aıasynda Qazaqstan Respýblıkasynyń Memlekettik hatshysy Gúlshara Ábdihalyqovanyń qatysýymen atalǵan joǵary oqý ornyndaǵy Qazaqstan Respýblıkasy Tuńǵysh Prezıdent zalynda ýnıversıtettiń Baıqaý keńesiniń otyrysy ótti. Budan keıin Gúlshara Naýshaqyzy TarMÝ tehnologııalyq kesheniniń alańshasynan boı kótergen «Ýnıversıet shejiresi» atty monýmenttiń ashylý saltanatyna qatysty. Memlekettik hatshy óz sózinde ýnıversıet ujymyn jáne stýdentterdi meretoıymen quttyqtap, búginde jastardyń sapaly bilim alýyna memleket tarapynan barlyq jaǵdaıdyń jasalyp otyrǵanyn atap ótti.
– Elbasy bıylǵy jylǵy «Qazaqstandyqtardyń ál-aýqatynyń ósýi: tabys pen turmys sapasyn jaqsartý» atty Qazaqstan halqyna Joldaýynda bilim sapasyn arttyrý máselesin erekshe aıtty. Nátıjesinde keleshekte de jastardyń bilim alýyna memleket tarapynan jaǵdaı jasala beretin bolady. Búginde osy ýnıversıtet qabyrǵasynda bilim alyp júrgen jastardyń egemen elimizdiń myqty azamattary bolatynyna, alǵa qoıǵan maqsattaryn birigip oryndaıtynyna senimim mol. Bul ýnıversıtet tarıhy óte baı. Kezinde osy jerden bilim alǵan azamattar búginde ár salada jemisti qyzmet atqaryp keledi, – dedi Gúlshara Naýshaqyzy.
Budan keıin Memlekettik hatshy Gúlshara Ábdihalyqova TarMÝ sport kesheniniń ashylý saltanatyna qatysyp, ýnıversıtet rektory Mahmetǵalı Sarybekovpen birge keshenniń lentasyn qıdy. Saltanatty jıynda sóz alǵan Gúlshara Naýshaqyzy bıylǵy jylǵy Elbasy Joldaýynda búkilhalyqtyq sportty damytýǵa erekshe kóńil bólingenin atap ótti.
– Bizdiń stýdent kezimizde mundaı sport keshenderi óte az bolatyn. Al búgin ýnıversıtet janynan ashylyp otyrǵan sport kesheni jastarǵa berilgen úlken múmkindik. Munyń bári de táýelsizdik tabystary dep bilemin. Sonymen qatar, bul jastar densaýlyǵynyń nyǵaıýyna, salamatty ómir saltyn qalyptastyrýǵa úlken áser etedi. Osy jerden talaı sport sańlaqtarynyń shyǵatynyna senimim mol. Taraz Memlekettik ýnıversıteti qashanda sport juldyzdarynyń altyn besigi, – dedi Gúlshara Ábdihalyqova. Al óz sózinde bokstan Afıny Olımpıadasynyń jeńimpazy, ýnıversıtet túlegi Baqtııar Artaev deni saý urpaqtyń básekege qabiletti bola alatynyn aıta kelip, ózi bilim alǵan bilim ordasynan bolashaqta da ataqty ǵalymdar men sportshylardyń shyǵa berýine tilektestigin bildirdi.
Elbasy «Prezıdenttiń bes áleýmettik bastamasy» atty halyqqa Úndeýinde jastardy jataqhanamen qamtý jaıyn basa aıtqan bolatyn. Búginde stýdentterdi jataqhanamen qamtý máselesinde Taraz Memlekettik ýnıversıteti jaqsy úrdisti bastady. Memlekettik hatshy Gúlshara Ábdihalyqova TarMÝ gıdrokesheninde de bolyp, jańa stýdenttik jataqhananyń alǵashqy tasyn qalaý rásimine qatysty. Bolashaqta boı kóteretin jataqhana «PIKO» qurylys kompanııasymen birge salynady. Bul rette rektor Mahmetǵalı Sarybekov atalǵan jataqhananyń qurylysy 2019 jyly qańtar aıynda bastalyp, 2020 jyly aıaqtalatynyn aıtty. Sonymen qatar, jataqhana 500 adamǵa arnalǵan. Jalpy quny 1 mıllıard 500 mıllıon teńgeni quraıdy. Gúlshara Naýshaqyzy jataqhana qurylysymen tanysyp, stýdentterdi jańa jataqhana qurylysynyń bastalýymen quttyqtady. Memlekettik hatshy óz sózinde sapaly bilim alý úshin de jaqsy jaǵdaıdyń kerek ekenin, búginde sol úshin memleket jastarǵa qamqorlyq jasap otyrǵanyn aıtty. Budan keıin ýnıversıtet jastarynyń atynan atalǵan bilim ordasynyń stýdenti Nursultan Satybaldy úndeý qabyldady.
Hamıt Esaman,
«Egemen Qazaqstan»
Jambyl oblysy
