Merekelik markalarda Qazaqstannyń tuńǵysh markasy – «Altyn sarbaz», Qazaqstandaǵy birinshi poshta telegraf-keńsesi jáne «Qazposhtanyń» jetistikteri men «Bolashaqtaǵy poshta balalar kózimen» sýretteri beınelengen.
Aqparat jáne kommýnıkasııalar mınıstri Dáýren Abaev poshta qyzmetkerlerin tól merekelerimen quttyqtap, tolaǵaı tabys tiledi. «Barshańyzdy búgingi poshta kúnimen jáne mereıtoılaryńyzben shyn júrekten quttyqtaımyn. Sizder tarıhy men ózine saı dástúri qalyptasqan uıym qura bildińizder. 25 jylda úlken belesti baǵyndyryp, zaman talabyna saı ózgerdińizder. Sıfrlandyrý dáýirinde sıfrly poshtany iske qostyńyzdar», dedi mınıstr.
«Qazposhta» AQ basqarma tóraǵasy Sáken Sársenov markalardyń belgi ǵana emes, elimizdiń maqtanysh etetin nyshandary ekenin atap ótti. «Búgin dúnıejúzilik poshta kúninde Aqparat jáne kommýnıkasııalar mınıstrligi men «Qazposhta» birlesip Qazaqstan poshtasynyń 25 jyldyq mereıtoıyna arnalǵan poshta markalar blogyn aınalymǵa shyǵarýǵa daıyn. Tórt markada qazaqstandyq poshtanyń jarqyn betteri beınelengen», deı kele 23 myńnan asa poshta qyzmetkerlerin quttyqtady. Sondaı-aq bolashaqta atqarar sharýa kóp ekenin naqtylaı ketti.
Quttyqtaý sózderden keıin Dáýren Abaev pen Sáken Sársenov eki markaǵa shtempeldik belgi basyp, qol qoıdy. Úshinshi jáne tórtinshi markalarǵa belgini 1977 jyldan bastap 2018 jylǵa deıin poshta salasynda uzaq jyldar boıy eńbek etip, «Qurmetti baılanysshy» degen tósbelgimen marapattalǵan Svetlana Svetova men poshta salasyndaǵy eńbek jolyn bastaǵanyna úsh aı bolǵan jas maman Álisher Satybaldın basty. Qazaq poshtasynyń 25 jyldyǵyna arnalǵan belgi – búgingi kúnge deıin shyǵarylǵan 1128-inshi marka.
Aqmaral AǴZAMQYZY,
«Egemen Qazaqstan»
