Elbasynyń bul Joldaýy elimizdiń áleýmettik-ekonomıkalyq damý máselelerine arnaldy. Joldaýda halyqtyń ál-aýqatyn arttyrý, kásipkerlikti damytý, áleýmettik salany qoldaý máselelerine basa nazar aýdaryldy. Elbasy, ásirese, ekonomıkanyń negizgi qozǵaýshy kúshi sanalatyn shaǵyn jáne orta bıznestiń búgingi damýyna toqtalyp, ony ary qaraı jandandyrýdyń negizi joldaryn aıqyndady. Memleket basshysy «Bıznestiń jol kartasy» baǵdarlamasyn 2025 jylǵa deıin uzartýdy usyndy.
«Bıznestiń jol kartasy» baǵdarlamasy 2010 jyldan beri júzege asyp keledi. Meniń óńirlerge barǵan issaparlarymda osy baǵdarlamanyń tıimdi júrgizilip jatqanyna kózim jetti. Sondyqtan ony 2025 jylǵa deıin sozý qajet. Oǵan jyl saıyn memleketten qosymsha 30 mıllıard teńge bólinýi tıis»,- dedi Nursultan Nazarbaev. Onyń aıtýynsha, bul baǵdarlama úsh jyl ishinde 22 myń jumys ornyn quryp, bıýdjetke salyq esebinen 224 mln teńge paıda ákelmek, sonymen qatar 3 trln teńgeniń ónimin óndirýge múmkindik beredi.
Sondaı-aq, Prezıdent 2019 jyldyń 1 qańtarynan bastap, shaǵyn jáne orta bızneske salyqtyq amnıstııa jarııalaýdy usyndy. Eger kásipker negizi salyqty tóleıtin bolsa, oǵan buǵan deıingi salynǵan aıyppuldary men ústemaqylar joıylatyn bolady.
Prezıdent búgingi joldaýda otandyq taýar óndirýshilerdiń ónimin qoldaýǵa shaqyrdy.
«Eksportqa baǵyttalǵan ındýstrııalandyrý – ekonomıkalyq saıasattyń alǵysharty bolýy tıis. Úkimet eksportpen aınalysatyn taýaróndirýshilerge nazaryn aýdarý qajet. Bul eń aldymen , óńdeýshi ónerkásipke qatysty bolý kerek», - dedi Elbasy N.Á. Nazarbaev.
Osy maqsatta ol barlyq qazaqstandyqtardy otandyq ónimdi qoldanýǵa shaqyrdy. Búgingi joldaýda Memleket basshysy halyqtyń densaýlyǵy men ál-aýqatyn arttyrýǵa basymdyq berýdi talap etti. Bul úshin JIО́ 10% bilim, ǵylym, medısınany damytýǵa jumsalatyn boldy. Sondaı-aq, Prezıdent kelesi jyly Muǵalimniń mártebesi týraly Zań qabyldaýdy tapsyrdy. Sonymen qatar, ol halyqtyń densaýlyǵyn jaqsartý maqsatynda taýarlar men qyzmet kórsetýdi qadaǵalaıtyn arnaıy komıtet qurýdy usyndy jáne agrarlyq sektordyń damýyna basa nazar aýdarý kerektigine toqtaldy.
El prezıdentiniń Qazaqstan halqyna joldaýyn tyńdaýǵa qatysqan kásipkerler óz pikirlerimen bólisti:
«Búgingi joldaýda biraz túıtkildi máseleler kóterildi dep oılaımyn. Biz medısına salasynyń júgin kóterip júrgen bıznes ókilderi retinde barlyq memlekettik qoldaýlarǵa qatysamyz. Sondyqtan, Memleket basshysynyń kásipkerlerge jáne áleýmettik sala qyzmetkerlerine nazar aýdarýy biz úshin qýanarlyq jaıt. Endi osy aıtylǵan máselelerdi belsendi júzege asyrýymyz kerek»,-deıdi «Semeınyı vrach ı Ko» klınıkasynyń basshysy Lıýdmıla Pokotılo.
«Elbasynyń tárbıeni bala-baqshalar men oqý oryndarynan bastaý kerek degen oıy unady. Shynynda da adamnyń adam bolyp qalyptasýy balalyqtan bastaý alady emes pe? Jan-jaqty damyǵan tulǵany qalyptastyrý úshin muǵalimder men tárbıeleýshilerge qoldaý kórsetý kerek. Ásirese, jeke bala-baqshalarǵa kóńil bólý qajet. Bul jerde biz memlekettik tapsyrystar men grant, sýbsıdııa bólý týraly aıtyp turmyz. Biz bul máseleni árdaıym kóterip kelemiz»,-deıdi Aqtóbe oblysynyń «Atameken» kásipkerler palatasy Isker áıelder keńesiniń tóraıymy Janar Eleýsizova.
«Bıznestiń jol kartasy baǵdarlamasyn 2025 jylǵa deıin uzartý óte durys sheshim dep esepteımin. О́ıtkeni jekelegen kásipkerlerdiń, ásirese, aýyldyq sharýalardyń bıznesi úshin bankter nesıe bere bermeıdi. Bul rette memlekettiń qoldaýymen jeńildetilgen nesıe alý sharýalarǵa aıtarlyqtaı kómek bolyp tur. Al salyq amnıstııasy týraly aıtatyn bolsaq, aıyppuldy tóleı alamaǵan bıznes sýbektileriniń jumysy toqtap qalǵan jaǵdaılar kezdesedi. Osy joldaý arqyly olardyń qaıta jandanýyna múmkindik berilmek. Sonymen qatar, El prezıdentiniń taýarlaryn eksportqa shyǵaratyn kásipkerler týraly saýalyna sapaly, básekege qabiletti taýaróndirýshilerdiń bizdiń óńirimizde kóptep sanalatynyn aıtyp ótsem deımin. Sapany qadaǵalaý isi, ásirese qurylys salasyna qajet-aq. Osy máselelerge oraı, Joldaý kásipkerlerdiń kókeıindegisin dóp basty deýge ábden bolady»,-deıdi «Aqtóbe oblysy «Atameken» kásipkerler palatasynyń Kásipkerlerdi qorǵaý jáne ákimshilik kedergilerdi azaıtý bóliminiń basshysy Nurlan Mahambetov.
Kásipkerler palatasy búgingi joldaýda aıtylǵan máselelerdi biraýyzdan maquldap, óz qyzmetteriniń barlyq baǵytynda paıdalanatyn boldy.
Temir QUSAIYN,
«Egemen Qazaqstan»
