Fılmge búrkitti qus patshasy dep dáriptegen kóshpendi halyqtyń qyran qusqa degen súıispenshiligi arqaý bolǵan. Oqıǵa jelisi boıynsha erte zamanda abjylan oıanyp, qazaq aýylyna úlken apat ákeledi. Qarsy kelgendi jalmap, jaıpap kele jatqan jylanmen qyran búrkit aıqasyp, inine qýyp tyǵady.
– Saharadaǵy qazaq alǵash bolyp qyran qusty qolǵa úıretip, qasterlep, kıe tutqan. Qazaqtar bes jasar búrkitti Muzbalaq dep ataıdy. Fılm maǵynasy qyran tekti, qyran minezdi ultpyz degen maǵynaǵa saıady. Bas keıipker Aqtaı men búrkit arasyndaǵy ajyramas dostyq týraly baıandalady, – deıdi qos rejısserdiń biri Tilek Tóleýǵazy.
«Muzbalaq» fılmi Turdybek Maıdan men Tilek Tóleýǵazynyń ulttyq salt-dástúr taqyrybyndaǵy ekinshi jumysy. Buǵan deıin qos rejısser qusbegilik taqyrybyndaǵy «Tastúlek» atty tamasha mýltfılmdi el nazaryna usynyp, zor qoshametpen qabyldaǵan bolatyn.
– «Tastúlek» fılmi shyqqan soń «Qazaqfılm» AQ prezıdenti Baqyt Ǵafýuly tolyqmetrli fılm túsirseńder dep usynys aıtty. Jańadan oqıǵa oılastyryp, qusbegilik taqyrybyna ssenarıı qurdyq. «Tastúlek» avtorlyq fılm bolsa, «Muzbalaq» kommersııalyq joba, – deıdi Tilek Tóleýǵazy.
Eki jyldan astam ýaqyt túsirilgen bul fılmge 40-qa jýyq kınematografııanyń anımasııa janrynda eńbek etip júrgen otandyq maman jumylǵan. Uzaqtyǵy 67 mınýt bolatyn mýltfılmniń 70 paıyzy 2D, 30 paıyzy 3D formatynda jasalyp, bas-aıaǵy 96 500 sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Tólebaev Erǵalı Dúısenuly, Alma Ádilqyzy esimdi teatr jáne kıno akterleri qatysqan. Fılm qazaq tilinde túsirilip, orys tiline dýblıajdalǵan. 18 qazannan bastap Astana, Almaty, Shymkent, Aqtóbe, Aqtaý, Atyraý qalalarynda eki tilde kórsetiletin bolady.
– Elimizdegi anımasııa salasy sońǵy 5-6 jylda qarqyndy damyp keledi. Degenmen memleket tarapynan júıeli josparlar qurylyp, jobalar jyl saıyn úzilissiz júrgizilip otyrsa deımiz. Álemdik deńgeıdegi stýdııalarymen teń dárejede jumys isteýge qaýqarymyz bar. Qazaqtyń ulttyq ańyz-ertegileri men batyrlyq jyr-dastandaryn zamanǵa saı etip jetkizgimiz keledi, – degen rejısser qoldaý bolsa, fılm túsirem dep qulshynyp otyrǵan talantty mamandardyń kóp ekenin aıtady.
Olardyń endigi maqsaty «Altyn adam» anımasııalyq fılmin jaryqqa shyǵarý. Belgili folklorıst-ǵalym Vıktor Gýsev «Genetıkalyq turǵydan alǵanda ádebıet qana emes, ónerdiń ózge de túrleri folklordan bastaý alady. Demek folklor – ónerdiń bastaý kózi» deıtin. Endeshe ulttyq qundylyqtardy ulyqtap qana qoımaı, tárbıeniń túp qazyǵy dep biletin jigitterdiń mazmundy mýltfılm túsire berýine tilekshimiz!
Aıa О́MIRTAI,
«Egemen Qazaqstan»
