«Sheberhana», «shyǵarmashylyq esep» degenimizben, Asanáli Áshimovtiń shákirtterinen quralǵan jańa teatr qaýyrsyn qanatyn jaıyp, óner álemine qanat qaqqan kún boldy bul. Kez kelgen jas teatrdyń máńgi ómirsheń klassıkadan attap kete almaıtyn ejelgi dástúri eskerilip, ómirge joldama alǵan jańa trýppa kópshilikke M.Áýezovtiń «Qaragózin» usyndy.
Premera aldynda Qazaqstannyń eńbek sińirgen qaıratkeri, PhD doktory, teatr dırektory Ashat Maemırov sóz alyp, jastarǵa, jańa teatrǵa ǵasyrǵa qadam basqan qarashańyraq óner ordasynyń atynan quttyqtaýyn jetkizdi. A.Maemırov teatr ónerinde mundaı tájirıbeniń burynnan kezdesetinin, mysaly, Máskeýde «Tabakerka» atalyp ketken Oleg Tabakovtyń teatr-stýdııasy, Vsevolod Shılovskııdiń teatry jumys isteıtinin, áıgili sheberlerdiń óz shákirtterinen trýppa jasaqtap, spektaklder qoıýy basqa teatrlardy dıalogqa shaqyrǵan ádemi qadam ekenin atap ótti. «Elbasy aldaǵy jyldy – Jastar jyly dep jarııalap jatyr. Jastarǵa jasaǵan naqty qoldaýymyz bolsyn dep, biz osyndaı sheshim qabyldap, jańa teatrdyń tusaýyn keskeli otyrmyz. Trýppa kórermenge alǵashqy úsh qoıylymyn usynǵaly otyr. «Qaragóz» M.Áýezov dramatýrgııasynyń injýi bolsa, I.Mıchchıdiń «Arystandar patshalyǵy» mýzykalyq dramasy, E.Tashkenbaıdyń «Sońǵy qońyraý» poetıkalyq dramasy, kórermen tamashalaıtyn úsh spektakl de úsh túrli janrda sahnalanǵan, ıdeıasy da, pishini de bir-birine uqsamaıtyn dara minezdi spektaklder», dedi jańa teatrǵa aqjol tilegen teatr dırektory.
Budan keıin Qazaqstannyń halyq artısi Núketaı Myshbaeva da ulttyń saltyna saı jas teatrǵa sáttilik tilep, kórermenge jaǵalata shashý shashty.
Shákirtteriniń úlken sahnadaǵy óneri men alǵashqy aıaqalysyna qýanyp, alǵysyn bildirgen ustazy A.Áshimov keleshekte teatrdyń jeke ǵımaraty da bolýy múmkin ekenin jetkizdi. Aıta ketý kerek, T.Júrgenov atyndaǵy Qazaq Ulttyq óner akademııasynda «Teatr óneri» fakýltetiniń Asanáli Áshimov sheberhanasynda 2014-2018 jyldary bilim alyp, osy jyly ǵana oqýdy támamdaǵan 30 jas túlek tutas bir ujym retinde aldaǵy ýaqytta úzdik qoıylymdar qoıyp, zaman talabyna saı júıemen jumys isteýdi kózdeıdi.
Aıgúl AHANBAIQYZY,
«Egemen Qazaqstan»
ALMATY
