«Kelesi jyldyń 1 qańtarynan bastap eń tómengi eńbekaqy 1,5 esege kóbeıedi. Bul oblystyń 32 myń turǵynyna, bıýdjet salasyndaǵy 25 myń adamǵa qatysy bar. Osy maqsattarǵa 2 mlrd teńge bólinedi», dedi oblys ákimi Erlan Qoshanov.
E.Qoshanov «Bıznestiń jol kartasy-2020» baǵdarlamasy boıynsha Qaraǵandy oblysynyń orasan zor tıimdilikti sezinip otyrǵanyn aıtty. «Birneshe sıfr keltireıin: 8 jyl ishinde baǵdarlamany qarjylandyrýǵa 17 mlrd teńge baǵyttaldy, 1,5 myń kásipkerge qoldaý kórsetildi, bıýdjetke 24 mlrd teńge salyq tólemderi aýdaryldy, 20 myń jańa jumys orny ashyldy, 168 mlrd teńge ınvestısııa salyndy», dep atap ótti oblys ákimi.
Budan soń Joldaýda týrızm salasyn damytýǵa erekshe kóńil bólinip, onyń ekonomıkanyń jyldam damýshy sektorlarynyń biri retinde atalǵanyn aıta kelip: «Prezıdent birinshi kezekte elimizdiń top-10 týrıstik nysan qataryna kiretin Balqash mańy aımaǵynda týrızmdi damytý boıynsha sharalar qabyldaýdy tapsyrdy. Bizdiń maqsat – 2023 jylǵa deıin Balqashtaǵy týrıster aǵynyn 2 esege kóbeıtý», dedi.
О́ńir basshysy bilim berý salasyndaǵy negizgi baǵyttardyń anyqtalǵanyn, endi tek olardy sapaly oryndaýǵa kirisý kerektigin aıtty.
«Búginde 3-ten 6 jasqa deıingi balalardy oqýmen qamtý 98,9%-ke jetti. Jyldyń sońyna deıin Memleket basshysynyń bul jastaǵy balalardy 100% qamtý jónindegi tapsyrmasyn merziminen buryn oryndaımyz degen josparymyz bar. Bıylǵy oqý jylynda oqýshylardyń 70 prosenti jańarǵan mazmun boıynsha bilim alyp jatyr. Jańa baǵdarlama boıynsha biliktilikti jetildirý kýrsynan jyldyń basynan beri 5 myń muǵalim ótti. Taǵy ne isteý kerek? Jańa baǵdarlamalar engizý kerek, bilikti mamandardy tartyp, olarǵa Nazarbaev zııatkerlik mektepteri úlgisinde jaǵdaı jasaý qajet», dedi E.Qoshanov.
О́ńir basshysy Elbasynyń «7-20-25» ıpotekalyq baǵdarlamasynyń oryndalýyna aıryqsha mán berip otyrǵanyna toqtaldy. Jyldyń sońyna deıin turǵyndardy nesıelendirý úshin 324 páter, al 2019 jyly 1 myńnan astam páter bólinetindigin aıtty. Sondaı-aq búginde alǵashqy jarnany sýbsıdııalaý máselesiniń sheshilip jatqanyn da málim etti.
Sonymen qatar oblys ákimi óńirde memlekettik qyzmetterdiń 74% elektrondy túrde kórsetiletinin, al 2020 jyly bul kórsetkish 90 prosent elektrondyq pishimde bolatynyn jetkizdi. Eksporttyq áleýetti kúsheıtý kerektigine de basa mán berip, bul saladaǵy máselelerge keńinen toqtaldy. Agrarlyq sektordaǵy «naqty eginshilik» – joǵary tehnologııalyq keshendi júıe jobalaryn júzege asyrý isiniń jalǵasatynyn málimdedi. Aımaqta kásipkerlikti qoldaý ári qaraı jalǵasyn tabatynyn aıtty.
E.Qoshanov óńirde buqaralyq sporttyń qoljetimdiligin arttyrýǵa basa kóńil bólý kerektigin atap ótti. «Búginde oblysta 17 dene shynyqtyrý-saýyqtyrý keshenin salýǵa suranys bar. Bıyl 3 keshen, keler jyly taǵy úsheýin salamyz. Jyl saıyn bıýdjet esebinen qalalar men aýdandarda 15 sporttyq alań men 20 hokkeı kortyn ornatamyz», dedi ol.
Jıyn barysynda E.Qoshanov Joldaýda aıtylǵan negizgi alty mindet boıynsha tıisti salalardyń basshylaryna naqty tapsyrmalar berip, olardyń oryndalý barysyn tikeleı óziniń baqylaýyna alatynyn málimdedi.
Sondaı-aq aktıv jınalysynda sóz sóılegen oblystyq máslıhattyń depýtaty, Qazaqstan halqy Assambleıasynyń Qaraǵandy oblystyq fılıaly janyndaǵy Qoǵamdyq kelisim keńesiniń tóraǵasy Bekzat Altynbekov, «Shahterskoe» JShS-niń dırektory Georgıı Prokop, №1 «Bilim ınnovasııasy» oblystyq lıseı-ınternatyndaǵy hımııa pániniń muǵalimi Abylaı Samatov, oblystyq jastar resýrstyq ortalyǵynyń dırektory Aqjol Qurmanseıitov Joldaýdyń basym baǵyttary týraly oılaryn ortaǵa saldy.
«Oblysta jumysty búginnen bastaýǵa ázir aqparattyq-nasıhat toptary qurylǵan. Bizdiń bárimiz, búgingi aktıv jınalysynyń qatysýshylary, máslıhat depýtattary, qoǵam qaıratkerleri bul iske bir kisideı jumylýymyz qajet. Joldaýda aıtylǵan áleýmettik mindetterdi oblystyń árbir turǵynyna jetkizýdiń mańyzy zor», dep qorytty jıyndy E.Qoshanov.
Qaırat ÁBILDA,
«Egemen Qazaqstan»
QARAǴANDY
