Áýlıeata topyraǵynda dúnıege kelip, arman arqalap Almatyǵa attanǵan ol qazaq mýzyka ónerinde ózindik deńgeıge kóterildi. Ár jyldary «Gúlder», «DosMuqasan» ansamblinde qyzmet atqardy. Onyń ánderin halyq ártisi Maqpal Júnisova, Eralhan Ábishev, Jubanysh Jeksenuly sııaqty ánshiler shyrqap, tyńdarman júregine uıalatqan bolatyn.
Kúz mezgili kelip, kúreń túskende Nurlan Baıgózov Taraz qalasyna kelip, «Balasaǵun» ortalyq konsert zalynda «Tarazymnyń altyn kúzi» atty estrada jáne djaz mýzyka festıvalin ótkizdi.
Nurlan Baıgózov tek dırıjer, kompozıtor ǵana emes, án árleýshi retinde de tanymal. Djaz janryn qaıta oraltyp, mýzyka ónerine sony soqpaq saldy. Bul keshte barlyq týyndylar estradalyq orkestrdiń súıemeldeýimen oryndaldy. Áýeli kompozıtordyń ózi jańasha baǵytta árlegen «Qyzdar-aı» atty halyq ánin «X band» toby naqyshyna keltire oryndady.
Festıval barysynda Jubanysh Jeksenuly, Eralhan Ábishev, Dáýren Seıitjan, Saıa Mahambet jáne ózge de ónerpazdar Nurlan Baıgózov shyǵarmalaryn shynaıy oryndady. Al kompozıtordyń kýbalyq dostaryna arnap jazǵan «I snova karnaval» atty ánin estradalyq orkestr músheleri joǵary deńgeıde oryndap, tyńdarmannyń kóńilinen shyqty. Sonymen qatar óner ıesiniń uly Erbol Baıgózov óziniń óleńderin oqyp, kópshilikti bir serpiltti. Eń bastysy, kópshilik kesh barysynda shyrqalǵan Nurlan Baıgózovtiń «Anaǵa arnaý», «Adasqan shaǵala», «Saǵynysh tamshysy», «Qazaq dalasy» sııaqty ánderi qazaq ónerine qosylǵan úles ekenin túısinip qaıtty. Kópshilik tyńdarman kompozıtorǵa degen qurmetin kórsetti. О́nerge degen adaldyǵyn saqtaǵan sańlaqtyń Áýlıeata aspanyn ánge bólegen sátin erekshe baǵalady.
Hamıt ESAMAN,
«Egemen Qazaqstan»
Jambyl oblysy
