Keshe Q.Jubanov atyndaǵy Aqtóbe óńirlik memlekettik ýnıversıtetine AQSh elshiliginiń mádenıet jáne bilim jónindegi kómekshisi Lens Erıkson arnaıy saparmen keldi. Strategııalyq damý jónindegi prorektor Q.Shúnkeev elshilik ókiliniń saparyna sáttilik tilep, oqý ordasynyń damý josparymen tanystyrdy.
Kezdesýde Jubanov ýnıversıteti men AQSh ǵylymı ortalyqtary, joǵary oqý oryndary arasynda baılanystardy nyǵaıtý, birikken ǵylymı jobalardy kóbeıtý, syrtqy akademııalyq utqyrlyq baǵdarlamasy talqylandy. Halyqaralyq yntymaqtastyq ortalyǵynyń bastyǵy Gúljan Shoqym oqytýshylar men stýdentterge qatysty birneshe jobany baıandap, usynystaryn aıtty.
Lens Erıkson: «Qazaqstanǵa kelgenime úsh aı boldy. Ǵylym jáne mádenıet salasyn zerttep, jumys josparyn pysyqtap jatyrmyz. Kelýimniń basty maqsaty - ýnıversıtetpen jaqynyraq tanysý, amerıkandyq oqý oryndarymen qarym-qatynas ornatýǵa kómektesý, sondaı-aq Qazaqstandaǵy AQSh elshiliginiń oqý baǵdarlamalary týraly aqparat taratý», dedi.
Kezdesýden soń Lens Erıkson Stýdentter saraıynda «Education USA Fair 2018» kórmesin aralady. AQSh elshiligi, Halyqaralyq bilim berýdiń Amerıkalyq keńesi qatysýymen uıymdastyrylǵan kórmeniń ereksheligi - AQSh kolledjderi men ýnıversıtetterine túsý joldary týraly aqtóbelik jastarǵa tolyq maǵlumat bere aldy. Bakalavrıat, magıstratýra men doktorantýraǵa shaqyrǵan on bes túrli oqý oryndary ishinde memlekettik jáne jekemenshik, álemdik reıtıngte alǵashqy ondyqta turǵan tanymal JOO men typ-tynysh qalashyqta ornalasqan kolledjder bar.
Amerıkalyq bilim júıesiniń alýan túrli usynystaryn sholyp shyqqan myńdaǵan stýdentter men oqýshylar suraqtaryn emin-erkin aǵylshyn tilinde qoıyp jatyr. AQSh-tan kelgen ókilder men eriktiler (volonter) myqtap daıyndalyp kelgen eken, jarnamalyq býkletter men kádesyılaryn taratyp, meıilinshe túsindirip baqty. Kórmeden soń Lens Erıkson bastaǵan ókilder Stýdentter saraıynyń kórermender zalynda AQSh bilim júıesi, talapkerler úshin qajetti qujattar, elshilik tarapynan kórsetiletin kómek joldary týraly baıandap, suraqtarǵa jaýap berdi. Úsh tildilik saıasattyń jemisin mektep oqýshylary kórsetti. «Aǵylshyn tilin kim erkin túsinedi?» degen suraqqa kórermenderdiń basym bóligi qol kóterdi. Suraqtaryn qoıyp, tikeleı suhbattasyp otyr. «Shet tilderin bilmeý - adamnyń óz múmkindigin shekteýi» degen osyndaıda eske túsedi.
Q.Jubanov atyndaǵy ýnıversıtet aımaqtaǵy ǵylym-bilim potensıalynyń úlken ortalyǵy. Oqý-bilimge, ǵylymı jańalyqtarǵa qatysty jıyndar, mańyzdy kezdesýler jıi ótkizilip turady. Aımaqtaǵy damý men suranys baǵytyn saralap, kerekti mamandardy el ishinen de, shetelden de shaqyryp, qyzmetkerlerdiń bilimin jetildirip otyratyn jaqsy dástúr qalyptasqan.
Aıshýaq DÁRMENULY,
Q.Jubanov atyndaǵy Aqtóbe óńirlik memlekettik ýnıversıteti,
Halyqaralyq yntymaqtastyq ortalyǵynyń aǵa ǵylymı qyzmetkeri
