Jıyn barysynda Rymǵalı Nurǵalıdiń rýhanı inisi, aqyn, S.Seıfýllın mýzeıiniń dırektory Nesipbek Aıtuly inilik iltıpatyn bildirip, ǵalymnyń ǵıbratty ǵumyry jaıly esteligimen bólisip, ustazdyq bolmysynan bólek, aǵalyq qamqorlyǵynyń bıik ekenin jetkizdi.
«Rymǵalı aǵanyń úıindegi syrmaqqa aýnap ósken baýyrlarynyń biri menmin. Ol kisi ótken ǵasyrdyń ekinshi jartysy, HH ǵasyrdyń basyndaǵy qazaq ádebıetiniń úlken tulǵasy. Onyń kitaptary, ásirese dramatýrgııa jónindegi eńbekteri, ádebı syndary, basqa da shyǵarmalary qazaq ádebıetinde, joǵary oqý oryndarynyń oqýlyqtarynda el barda, jurt barda oqytyla beredi, júre beredi dep oılaımyn. Biz aǵanyń tárbıesin kóp kórdik. Aǵanyń jetekshiliginde qanshama doktorlar osy ádebıet salasynda eńbek etip júr. Ol kisi qazirgi Shyǵys Qazaqstan oblysynyń Abyraly aýdany, Qaınar aýylynda týǵan. Biraq mektepti Shubartaý aýdany, Barshatas aýylynda bitirgen. Muhtar Maǵaýın, Tólek Tileýhanov barlyǵy bir mekteptiń túlekteri. Men de sol oqý ordasynda oqyǵanyma maqtanamyn. Sondyqtan biz aǵanyń tárbıesin kóp kórdik. Ol kisi óte suńǵyla adam edi, tereń adam edi. Inilerine qamqor bola bildi. Ásirese, ult taǵdyryna, el taǵdyryna qatysty másele týyndasa, aldyńǵy shepte júretin jaýynger sııaqty edi. Rymǵalı aǵa ǵylym men bilim jolynda tabany taımaı ótken tarlandardyń biri. Ol kisiniń eren eńbegi eldiń sanasynda saqtalyp, jadynda jattalyp turatynyna men senimdimin. Búgingi qoıylyp jatqan taqta aǵanyń atyn urpaqtan-urpaqqa jalǵaıtyn altyn kópir bolyp, onyń azamattyq tulǵasyn asqaqtatyp turatyn belgi bolmaq», dedi N.Aıtuly.
Eýrazııa ulttyq ýnıversıtetiniń rektory Erlan Báttashuly ǵalymǵa arnalǵan sharapatty sharanyń taǵylymy men tálimi mol oqıǵa ekenin alǵa tartyp, eskertkish taqta sándik úshin ornatylmaıtynyn tilge tıek etti.
«Rymǵalı aǵa talantty jastardy taba bildi, tanı bildi. Olardy ósirip, ǵylym jolynda tabandy bolýǵa tárbıeledi. Eńbekke endi aralasyp, ǵylym jolyndaǵy baǵytymyzdyń qalyptasý kezeńinde ol kisiniń qasynda júrgenimizge ózimizdi baqytty sanaımyz. Aǵa Astanaǵa alǵashqylardyń biri bolyp qonys aýdardy. Árıne Almatyda jyly aýa raıy, taýdyń baýraıynda jaıly ómir súre berýine bolatyn edi. Biraq ol kisi jaılylyqty izdegen joq. Kerisinshe, qaı jerde qıynshylyq bar, qaı jerde kúres bar sony sheshý joldaryn qarastyrdy. Ol kisiniń boıynan Alash qaıratkerleriniń qasıeti kórinip turatyn. Astananyń qazaqy qala bolyp qalyptasýyna úlken úles qosyp, rýhanı ómirine tyń serpin berdi», dedi Erlan Sydyqov.
Saltanatty jıynǵa qatysqan Astana qalasy ákiminiń orynbasary Ermek Amanshaev Rymǵalı Nurǵalıdiń ǵylymdy súıetin, bilimdi, bilikti jastardyń shoǵyryn tárbıelep shyǵarǵanyn, qazirgi ýaqytta onyń tárbıesin kórgen tálimgerleri dúnıeniń ár túkpirinde eleýli eńbek etip jatqandaryn tilge tıek etti.
Raýan QAIDAR,
«Egemen Qazaqstan»
