Belgili rejısser Qano (Qanymbek Qasymbekov) ekeýmiz bizdiń aýyldy jaıaý aralap kelemiz. Qarsy aldymyzdan kezdese qalǵan tanys jigitter: «Káni, úıge júrip, shaı ishińizder», deıdi. Biraq biz shyn kóńilimizden raqmetimizdi aıtyp, ári qaraı aıańdap kete baramyz. Kenet jańaǵy shaıǵa shaqyrǵan jigit sońymyzdan daýystap: «Kóke, onda kafege júrseńizdershi!» dep qalady.
Qano basyn shaıqap, ezý tartady. Sodan soń: «О́zimiz qaladan da, kafeden de qashyp, osynda kelgen joqpyz ba», deıdi.
Mine, sóıtip kóshede kezdesken birneshe jigit áýeli úıine, sosyn kafege shaqyrǵan kezde Qano tańǵalyp: «Áı, bulardyń bári nege kafege shaqyrady?» dedi oılanyp.
Men bolsam, «bilmeımin» degendeı ıyǵymdy qozǵadym.
– Qyzyq eken, – dedi Qano.
Tap osy kezde qarsy aldymyzdan baıaǵyda-a-a menimen mektepte birge oqyǵan Dáshán (shyn aty Jaılybaı) shyǵa keldi de:
– O-oý, munda qaıdan adasyp júrsińder?! – dep ıyǵymnan qapsyryp qushaqtaı aldy. – Qane, úıge júrińder.
– Raqmet. Jańa ǵana quda-qudaǵıdikinen toıyp tamaq iship shyǵyp ek.
– Olaı bolsa kafege júrińder! Bir-bir kúrishke salqyn syradan tartyp-tartyp jibereıik.
– Áı, – dedi kenet Qano maǵan qarap ishek-silesi qata kúlip, – sol kafege barsaq, baraıyqshy!
– Jaqsy. Baraıyq.
Bizdiń jigitterdiń kafe degeni baıaǵy jazdyq klýbtyń janynan salynǵan uıadaı ǵana baspana eken. Shatyry, esik-terezesi qyzyl tústi syrmen syrlanypty. Mańdaıshasynda «Kafe» degen jazýy bar.
Ishke kirdik. Jaıǵasyp otyrdyq. Dáshán myrza:
– Ofısıant! – dep daýystap, boıy syryqtaı bir sary balany shaqyryp aldy. – Al ákele ber!
– Maqul, kóke.
– Mine, bizdiń kafe osyndaı! – dep jymıdy Dáshán.
Qano bolsa, maǵan qarap:
– Sen buryn munda bolyp pa ediń? – dedi aqyryn ǵana.
– Joq.
– Qaıdan bolsyn, – dedi Dáshán. – Bul bizdiń Montaıdaǵy tuńǵysh kafe. Byltyr ǵana ashyldy.
Iá, ras. Bizdiń Montaı – Montaı bolǵaly ashylǵan tuńǵysh kafe! Sondyqtan aýylǵa kelgen qonaqtardy kafege shaqyrý erekshe qurmet bolyp esepteledi.
– Mine, fılm! –dedi muny estigen Qano ishek-silesi qata kúlip. – Jigitter, meniń bar ǵoı Montaı týraly bir tamasha kartına túsirgim kelip ketti!
Átteń... Taǵdyr ondaı kúnge jetýdi jazbapty. Bizdiń Montaıdyń kafesin jıi-jıi esine alyp, rıza bolyp, ol týraly ssenarıı jazý kerek dep elpildep júretin kóńilshek Qano kúnderdiń bir kúninde bul dúnıemen ún-túnsiz qosh aıtysty da, baqılyq saparǵa attanyp kete bardy...
Nurǵalı ORAZ,
«Egemen Qazaqstan»
