Aqtóbedegi kelisti keshen – olardyń Qazaqstandaǵy alǵashqy jobasy. Atalǵan arena álemdik standarttar men tehnologııalarǵa tolyqtaı sáıkes keledi. Sondyqtan muz saraıynda álem chempıonattaryn ótkizýge de ábden bolady. Slovakııalyq ınvestorlardyń taǵy bir artyqshylyǵy qurylysqa qajetti quraldardy ózderi óndirip, ózderi shyǵaratynynda. Keshenge ornatylǵan jabdyqtar muz temperatýrasyn qalypty ustap turýǵa múmkindik beredi.
Muz alańy negizinen hokkeıden jarystar ótkizýge arnalǵanymen, munda sonymen birge mánerlep syrǵanaý sekildi muz ústinde oınalatyn sporttyń barlyq túrin ári ártúrli oıyn-saýyq sharalaryn ótkizýge tolyq jaǵdaı bar. 3000-ǵa jýyq kórermenge arnalǵan kelisti sport kesheniniń jalpy aýmaǵy 8500 sharshy metr. Sondaı-aq onyń quramyna májilis pen jattyǵý zaldary, keńseler, sport taýarlary dúkeni men qoǵamdyq tamaqtandyrý júıesi kiredi.
Muz sport saraıynyń esigi tek kásibı sportshylar úshin ǵana emes, sonymen birge áýesqoılar jáne hokkeımen jappaı aınalysýshylarǵa da aıqara ashyq. Atalǵan keshenniń iske qosylýyna baılanysty taǵy bir aıta keterlik másele, osy arqyly aqtóbelikter Qazaqstannyń jastar hokkeı lıgasyna qatysýǵa múmkindik alyp otyr. Buǵan jańadan qurylǵan «Aqtóbe» hokkeı komandasy berik negiz qalaıdy. Osy maqsatta Qazaqstannyń úsh dúrkin chempıony, buǵan deıin «Ertis» hokkeı komandasyn jattyqtyryp kelgen Iýlıýs Penzes shaqyrylǵan.
Temir QUSAIYN,
«Egemen Qazaqstan»
AQTО́BE
