- Búgin biz qazaqstandyq ásker qataryna jas jigitterimizdi Otan aldyndaǵy boryshyn atqarýǵa jiberemiz. Biraq, boryshtan bólek, áskerı qyzmet – sarbaz úshin eń jaqsy ómirlik mektep. Áskerdegi qyzmet birqataryńyzǵa jetilý, minez, batyldyq úshin ómirlerińizdegi alǵashqy synaq,- dedi Nurlan Noǵaev. – Búginde bizdiń elimiz álemdik keńistikte ózine laıyqty orny bar memleket. Bul, álbette, Elbasymyz, bas qolbasshy Nursultan Nazarbaevtyń ishki jáne syrtqy sarabdal saıasatynyń arqasy. Qazaqstandyq ásker úshin materıaldyq-tehnıkalyq baza, áleýmettik kómek turǵysynan barlyq jaǵdaı qarastyrylǵan. Bul bizdiń áskerge shekaramyzdy qorǵaýda alǵa qoıylǵan strategııalyq tapsyrmalardy oryndaýǵa múmkindik beredi. Jas sarbazdarǵa azamattyq boryshtaryn laıyqty túrde ótep, anttaryna adal bolýlaryn tileımin.
Oblys basshysy sonymen qatar, jaýyngerlerge áskerı qyzmet qıyndyǵyna moıymaı, aman oralyp, batyldyq tanytyp, muqtaj adamdarǵa árdaıym kómek kórsetýge qabiletti bolýlaryn tiledi.Basty mindet – jas urpaq sanasynda óz eli men bolashaǵyna degen maqtanysh pen jaýapkershilik sezimin oıatý. Kóptegen jastar Otanǵa qyzmet etý – ár er azamattyń boryshy ekenin túsinedi.
Atyraý oblystyq qorǵanys isteri departamentiniń basshysy, polkovnık Batyrhan Aqbalıevtyń aıtýynsha, búgingi jaýyngerlerdiń ár qaısysy naǵyz sarbaz bolýǵa laıyqty.
- Áskerdegi qyzmet keshegi jasóspirimdi keleshek Otanyna adal er azamat bolýǵa tárbıeleıdi. Aq jol tileımiz, - dedi Batyrhan Aqbalaev.
Atyraý qalalyq ardagerler keńesiniń tóraǵasy Álipqalı Bekesh jáne sarbazdardyń týysqandary da óz tilekterin bildirdi.
Aıta keteıik, 10 qyrkúıekte Qazaqstanda sarbazdardy kúzgi Qarýly Kúshter qataryna shaqyrý bastalǵan bolatyn. Respýblıka boıynsha 1992-2000 jyly týylǵan 17 myńnan asa azamatty shaqyrý josparlanǵan. Atyraý oblysynan kúzgi maýsymǵa 826 sarbaz shaqyryldy. 215-i áskerı bólimderge ornalasýǵa jiberildi. Olardyń 175-i UQK Shekara qyzmetine, 40-y Qarýly Kúshterge qabyldandy.
