Reseı-Qazaqstan qarym-qatynasy – memleketaralyq baılanystyń etalony
Prezıdent Nursultan Nazarbaev óziniń Qazaqstan halqyna Joldaýynda respýblıkanyń Reseımen, Qytaımen jáne AQSh-pen qarym-qatynasy týraly sóz qozǵady. Bul týraly Eýrazııa qurlyǵyndaǵy mańyzdy saıası jáne áleýmettik-ekonomıkalyq prosesterdi qozǵaıtyn Eurasia Daily aqparattyq agenttigi jazdy.
Aqparat agenttigi N.Nazarbaevtyń Qazaqstannyń Reseı Federasııasymen qarym-qatynastary – memleketaralyq baılanystyń etalony. Eýrazııalyq ekonomıkalyq odaq tabysty jumys isteıdi, ol tolyqqandy ıntegrasııalyq birlestik jáne álemdik ekonomıkalyq qatynastardyń belsendi qatysýshysy», dep atap ótkenin, sondaı-aq Ortalyq Azııa aýmaǵyndaǵy ózara árekettestiktiń jańa paraǵy ashylǵanyn, Qytaı Halyq Respýblıkasymen de jan-jaqty strategııalyq áriptestik qarqyndy damyp kele jatqanyna nazar aýdarǵanyn jazady.
«Qańtar aıyndaǵy Vashıngtonǵa resmı sapary jáne Prezıdent Donald Tramppen kelissózder barysynda Qazaqstan men AQSh-tyń XXI ǵasyrdaǵy keńeıtilgen strategııalyq seriktestigi týraly ýaǵdalastyqqa qol jetkizildi dep jazdy aqparat agenttigi. Sondaı-aq Eurasia Daily aqparattyq agenttigi Memleket basshysynyń Sırııa boıynsha Astana prosesi týraly aıtqanyna da jekeleı toqtalǵan. «Bul prosess osy eldiń daǵdarystan shyǵýy jáne jaǵdaıdy beıbit jolmen retteý boıynsha kelissózderdiń birden-bir tıimdi jumys isteıtin formatyna aınaldy», degen bolatyn Qazaqstan Prezıdenti.
Azamattarǵa naqty kómek
Álemdik BAQ Qazaqstan Prezıdenti Nursultan Nazarbaevtyń el ekonomıkasyn damytýǵa baǵyttalǵan eń tómengi jalaqyny kóbeıtý tapsyrmasy týraly habar taratty. Sonyń biri – orys tilinde habar taratatyn memleketaralyq «MIR 24» teleradıokompanııasy.
Qazaqstan Prezıdenti 2019 jyldyń 1 qańtarynan bastap eń tómengi jalaqyny arttyrýdy tapsyrdy. Tapsyrmaǵa sáıkes, jalaqy 1,5 ese, ıaǵnı 28-den 42 myń teńgege deıin artýy tıis. N. Nazarbaev bul árbir qazaqstandyq úshin naqty kómek bolatynyn atap ótti.
«Bul kásiporyndar men bıýdjettik uıymdar qyzmetkerleriniń jalaqysy orta eseppen 35%-ǵa artady degen sóz. Bul kórsetkish jalpy alǵanda 1,3 mıllıonnan astam adamǵa qatysty. Osy maqsattarǵa 2019-2021 jyldarda respýblıkalyq bıýdjetten jyl saıyn 96 mıllıard teńge bólinedi, dep málimdedi el Prezıdenti», dep habarlaıdy «MIR 24» teleradıokompanııasy.
Qazaqstanda eń tómengi jalaqy ósedi
Ázerbaıjannyń AzerNews aqparattyq agenttigi de osy máseleni nazardan tys qaldyrmady. «Qazaqstan Prezıdenti Nursultan Nazarbaev 2019 jyldyń 1 qańtarynan bastap Úkimetke eń tómengi jalaqyny 28 000 teńgeden (80 AQSh dollary) 42 000 teńgege (115 AQSh dollary) deıin ósirýdi tapsyrdy. Osy tapsyrmany oryndaý úshin 2019-2021 jyldarǵa arnalǵan respýblıkalyq bıýdjetten 96 mlrd teńgeden astam (260 mln AQSh dollary) qarjy bólinedi» dep jazdy aqparat agenttigi.
Budan ári BAQ atalǵan ózgeristiń barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyn tikeleı qamtıtynyn, bıýdjettik mekemelerde jumys isteıtin 275 myń qyzmetkerdiń eńbekaqysy kóbeıip, orta eseppen 35 paıyzǵa ósetinin atap ótken.
«Endi eń tómengi jalaqy eń tómengi kúnkóris shegine baılanysty bolmaıdy. Eń tómengi jalaqynyń jańa mólsheri búkil ekonomıka aýqymyndaǵy eńbekaqy ósiminiń katalızatoryna aınalady», dep tolyqtyrdy N.Nazarbaev. Memleket basshysy bul bastamany qazaqstandyq jáne sheteldik iri kompanııalardyń qoldaıtynyna da senim bildirdi, dep habarlaıdy AzerNews. Sondaı-aq aqparattyq agenttik tamyz aıynda Qazaqstandaǵy eń tómengi kúnkóris deńgeıi 80 dollardy quraǵandyǵyn, sońǵy ret Qazaqstandaǵy eń tómengi jalaqy 14%-ǵa, 66-dan 80 dollarǵa deıin óskendigin de aıta ketken.
Qazaqstan polısııasy qaıta attestattaýdan ótýi tıis
Prezıdent Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda quqyq qorǵaý organdarynyń jumysyna tereń jáne sapaly ózgerister qajet ekenin atap ótti, dep jazady О́zbekstannyń táýelsiz ınternet gazeti.
«Qaýipsizdik turmys sapasynyń ajyramas bóligi bolyp sanalady. Ishki ister organdarynyń qyzmetkerleri qylmyspen kúreste «aldyńǵy shepte» júredi, kóbine óz basyn qaterge tigip, azamattardy qorǵaıdy», dedi el Prezıdenti. Memleket basshysynyń aıtýynsha, azamattar sanasynda polıseıler jazalaýshy emes, kerisinshe qıyn jaǵdaıda kómek kórsetýshi degen túsinik ornyǵýy kerek», dep jazdy О́zbekstan ınternet resýrsy.
Sholýdy daıyndaǵan
Mádına JÁLELQYZY,
«Egemen Qazaqstan»
