Elmen birge mereılendik

El Táýelsizdiginiń 20 jyldyǵyna oraı Elbasy N.Nazarbaevtyń saltanat­ty jıynda sóılegen sózin ynta qoıa tyńdadyq. Iá, aýyz toltyryp aıtatyndaı ná­tıe­­je de, basqa el qyzyǵatyn tabystar da barshylyq eken. El­basy óz baıandamasyna táýelsizdik alǵan 20 jylda qol jetken kór­setkishterdi saralap aıtyp berdi. Jan basyna shaqqanda on myń dol­lardan astam tabysqa qol jetken eken. Aýyl sharýa­shy­lyǵy sa­lasynda da aıtarlyqtaı nátıje bar, biraq qol jetkendi mise tut­paı, mal tuqymyn asyl­dandyrý, et pen sútti óndirýde áli kóp ister atqarý qajettigi nazardan tys qalǵan joq.

Elbasynyń mereıli merekede sóılegen sózin tyńdap otyrǵanda kóz aldyma osydan jıyrma jyl burynǵy qıyndyqtar men problemalar keldi. Kendi Altaıda eń birinshi bolyp men keńshardy sa­typ alyp, óz betimshe tyrbanyp eńbek ete bastadym. Bul 1988 jyl bolatyn. Naryq kelgennen keıin qyspaqqa ala bastady. Tipti, jabylýdyń az-aq aldynda qal­dyq. Aýyl sharýashylyǵyn tara­typ jiberý ońaı bolǵanymen, bar­lyǵyn qaıtadan bastaýǵa týra keldi. Aqyry birtindep qıyn­dyq­tar­dy túzeı basta­dyq. Nesıe aldyq, birneshe jyl buryn kókónisti gollandyq tásilmen egip, ósirýdi júzege asyrdyq. Jańa tehnıka, qajet­ti gerbısıdti paı­da­la­nyp, kókónisten jo­ǵary ónim ala bas­tadyq.

Qazir men basqaratyn sharýa qojalyǵynda elýden astam adam eńbek etedi. Jalaqylaryn ýaq­ty­ly tólep turamyz. Qazaqstannyń sońǵy jyldarda qol jetken ta­bystary shynynda da maqtaýǵa turarlyq. Sammıt ótkizý, EQYU-ǵa tóraǵalyq etý, Azııa oıyn­daryn­da top jarý kez kelgen damyǵan memleketterdiń qolynan kele bermeıdi. Elbasynyń aby­roıy artyp, qazir búkil álem jurt­shylyǵy Qazaqstandy tanı bastady. Eldegi tatýlyq pen yn­tymaq, beıbitshilik basty qundy­lyqtarymyz bolsa kerek. Alaıda, jat pıǵyldy adamdardyń el tynyshtyǵyn buzǵysy keletini, árkimdi oılandyrýy kerek degen oıdamyn. Keshegi Jańaózendegi jaǵdaı, terrorlyq áreket jasa­ǵysy kelgenderdiń bolýy sonyń áreketi emes pe. Endeshe, Qazaq­stan­nyń gúldenýi úshin árqaı­symyz úles qosa bereıik.