Palata Spıkeri «Elektrolız» zaýytynda bolyp, kásiporynnyń jumysymen tanysyp, iri ónerkásip nysandaryna bardy. О́ndiristik qýaty jylyna 250 myń tonna ónim óndiretin zaýyt alıýmınıı, tehnologııalyq alıýmınıı quımalaryn shyǵarady. Ishki naryqtan basqa, ónimder álemniń 20-dan astam eline, sonyń ishinde Reseı, Belarýs, О́zbekstan jáne Eýropa elderine jóneltiledi.
Jyldan-jylǵa óndiristik qýatyn arttyryp kele jatqan zaýyttyń ashylýyna on jyl buryn Memleket basshysy Nursultan Nazarbaev ózi bastamashy bolǵan. Sondyqtan Elbasynyń barlyq bastamalary zaýyt ujymy tarapynan erekshe qoldaý tabady. Kásiporynnyń qyzmetkerleri Prezıdenttiń bastamalaryna belsendi túrde óz úlesterin qosýǵa daıyn. N.Nyǵmatýlın aldaǵy ýaqytta óńdeýshi ónerkásipti qoldaýǵa erekshe nazar aýdarylatynyn, sondaı-aq jańa tehnologııalardy damytýǵa zor kóńil bólingenin aıtty.
Májilis Tóraǵasy odan ári Joldaýdyń basym baǵyttaryna toqtala kelip, ol búkil halyqtyń, árbir shańyraqtyń, árbir azamattyń jaǵdaıyn jaqsartýǵa arnalǵanyn atap ótti. Onda eń aldymen áleýmettik salanyń mańyzdy mindetteri, otbasy, turǵyn úı, shaǵyn bıznes, eńbekaqy, jastar, aýyl sharýashylyǵy, quqyq qorǵaý júıesin jańǵyrtýdyń joldary kórsetildi. Eń bastysy, olardyń barlyǵy oryndalatyn, naqty jáne qajetti maqsattar.
Osyndaı naqty josparǵa qurylǵan, halqymyzdyń, elimizdiń ıgiligin kózdeıtin, iri isterge jol ashatyn Joldaýdy oryndaýǵa belsene qatysý árbir azamattyń abyroıly mindeti ekenin aıtqan N.Nyǵmatýlın bul depýtattyq korpýstyń zań shyǵarý jumysynyń da eń negizgi baǵyty ekenin atap ótti.
Odan ári Májilis Tóraǵasy «Jastar bastamalaryn damytý ortalyǵyndaǵy» jastarmen kezdesti. Ortalyq bes jyldyń ishinde kóptegen shyǵarmashylyq ıdeıalar men jańa jobalardy júzege asyrdy. Sonymen birge ortalyqtan jumyspen qamtý, quqyqtyq jáne psıhologııalyq qoldaý kórsetý men memlekettik turǵyn úı baǵdarlamalary jáne jastar kásipkerligi týraly aqparattar alýǵa bolady.
Bolashaq ekonomıkasynyń jańa tehnologııalary, shaǵyn jáne orta bıznestiń damýy, jastarǵa áleýmettik qoldaý kórsetý – Joldaýdaǵy osy baǵyttardyń barlyǵy jas býynǵa jaqyn jáne túsinikti. Sondyqtan olarǵa jańa qadamdar jasaýǵa múmkindik beredi.
Májilis Tóraǵasy jastarmen kezdesýde Elbasymyz Nursultan Ábishuly Nazarbaev árqashanda jastar máselesine erekshe nazar aýdaryp kele jatqanyn aıtty. Palata Spıkeri sondaı-aq Elbasynyń Joldaýyndaǵy basymdyqtarǵa toqtalyp, bul jastardy jáne otbasy ınstıtýtyn jan-jaqty qoldaýǵa baǵyttalǵanyn, 2019 jyldyń «Jastar jyly» dep jarııalanǵanyn atap kórsetti.
О́z sózinde N.Nyǵmatýlın:
– Kelesi jyl – sizder úshin mańyzdy, maǵynaly jáne qyzyqty oqıǵalarǵa toly jyl bolatyny sózsiz. Onyń barlyǵy jastardyń qoǵamdaǵy rólin arttyrýǵa, áleýmettik jaǵdaıyn kóterýge, tıimdi eńbekpen aınalysýǵa jańa serpin beretin bolady, – dedi.
Elbasymyzdyń jańa tehnologııalarǵa, ınnovasııaǵa jáne avtomattandyrýǵa zor mán bergenin aıtqan Palata Spıkeri osy jolda jastardyń shyǵarmashyl ıdeıalary barlyq reformalardy tıimdi júzege asyrý úshin óte qajet ekenin atap ótti.
Kezdesý barysynda Nurlan Nyǵmatýlın jastardyń suraqtaryna jaýap bere kelip, Elbasy qoıǵan aýqymdy mindetterdi júzege asyrý úshin barlyq jastyń belsene qatysýy kerektigine toqtaldy. Al óz kezeginde Parlament Elbasy Joldaýyn zańnamalyq turǵydan qamtamasyz etýdiń barlyq is-sharalaryn qolǵa ala otyryp, saılaýshylardyń kezdesý barysynda aıtqan usynys-pikirlerin esepke alatyn bolady.
Farıda BYQAI,
«Egemen Qazaqstan»
PAVLODAR
