Oqıǵa jónindegi alǵashqy málimetter sońǵy derekter negizinde ózgerdi. Naqtylaı aıtqanda, jarylys pen qarýly shabýyldan qaza tapqandar sany 21 adamǵa jetken. Kerchinfo.com saıty mert bolǵandardyń jalpy sanyn, aty-jónderin jarııalady. Olardyń on altysy stýdent bolsa (qaza tapqan stýdentterdiń altaýy kámelet jasyna tolmaǵandar), beseýi eresek adamdar (kolledj qyzmetkerleri).
Jarylys pen qarýly shabýyldan jaraqat alǵandar sany da az emes. Sońǵy derekterge qaraǵanda, oqıǵa saldarynan japa shekkender – 44 adam (jeteýi – óte aýyr, úsheýi – aýyr, qalǵandary orta deńgeıde jaraqat alǵan). Jaraqat alǵandarǵa tıisti medısınalyq járdem kórsetilýde. Zardap shekkenderge kómek kórsetý úshin ózge aımaqtardan psıhologtar men bilikti dárigerler jetkizilgen.
Reseı Densaýlyq saqtaý mınıstri V.Skvorsova málimdegendeı, qaza tapqandardyń basym bóligine oq tıgen, al jaraqat alǵandardyń kópshiligi jarylystan japa shekken.
Reseı Prezıdenti atalǵan oqıǵaǵa baılanysty arnaıy málimdeme jasady. Ol qaza tapqandardyń otbasylary men jaqyndaryna kóńil aıtyp, jaraqat alǵandardyń tezirek saýyǵyp ketýin tiledi. V.Pýtın, sondaı-aq oqıǵanyń barlyq sebepteri men saldarlary jiti tekserilip jatqanyn, ol týraly barlyq aqparattar halyqqa búkpesiz jetkiziletinin atap ótti.
Keshe Reseıdiń federaldy qaýipsizdik qyzmeti ókilderi men Qyrym basshylyǵy oqıǵa ornynda boldy. Qyrym basshysy habarlaǵandaı, qarýly shabýyldy bir ǵana adam jasaǵan. Ol: «Eger oqıǵaǵa taǵy bireýdiń qatysy bolsa, onda ony tergeý barysy anyqtaıdy. Kúdikti ózin ózi óltirgen. Men onyń máıitin óz kózimmen kórdim», dedi.
Reseılik aqparat kózderiniń habarlaýynsha, qarýly shabýyldy 18 jastaǵy Vladıslav Roslıakov jasaǵan. Ol atalǵan polıtehnıkalyq kolledjdiń 4-kýrsynyń stýdenti bolǵan. V.Roslıakov shabýyldan keıin óz-ózin atyp óltirgen. Tergeýshiler kúdikti turǵan páterge tintý júrgizgen.
Kúdikti osydan shamamen bir aı buryn qarý ustaýǵa ruqsat alǵan. Bul jóninde Qyrym tótenshe jaǵdaılar qyzmetiniń ókili: «Ol kámelettik jasqa tolǵan. Barlyq medısınalyq tekserýler men qajetti rásimderden ótken. Sonyń ishinde ony psıholog dáriger de qaraǵan. Ol barlyq qajetti qujattardy ótkizip, qarý ustaýǵa ruqsat alǵan. Barlyq talaptar zańdy ári resmı túrde júrgizilgen», deıdi.
Derekterge qaraǵanda, osy jylǵy 12 qazan kúni V.Roslıakov qarý-jaraq dúkeninen 8, 12 kalıbrli «Hatsan» dep atalatyn qarý (onyń quny 19-22 myń rýbl bolatyn kórinedi) jáne 150 patron satyp alǵan.
Belgili bolǵandaı, kúdiktiniń ákesi men sheshesi ajyrasyp ketken. Ol sheshesi ekeýi jaldamaly páterde turǵan. Anasy Kerch onkologııalyq dıspanserinde jumys isteıdi eken. Tergeý amaldaryna baılanysty tıisti oryndardyń ókilderi kúdiktiniń sheshesin alyp ketýge kelgende ol kolledjdegi shabýyl kezinde jaralanyp, aýrýhanaǵa jetkizilgenderge kómektesip jatady.
Tanystarynyń aıtýynsha, kúdikti áleýmettik jeli men qarýǵa úıir bolǵan kórinedi.
Aıta keteıik, alǵashqyda atalǵan oqıǵa lańkestik áreket dep baǵalanǵan bolatyn. Keıinnen ol Reseı tergeý komıteti tarapynan «bir nemese birneshe adamdy óltirý oqıǵasy» dep, ony qylmystyq is retinde sıpattady.
Joldybaı BAZAR,
«Egemen Qazaqstan»
