Rýhanı mán-maǵynasy tereń bul poezııa baıqaýyna óńirdiń aýyl, qalalarynan 31 oqýshy qatysty.
Osy aıtýly sharaǵa qatysýshy Qalqaman aýyly mektebinen kelgen Aıtolǵan Júnishan, Aqqýly aýdany Tilektes orta mektebiniń shákirti Maqpal Haıratbek, Sharbaqty aýdany Esilbaı orta mektebiniń namysyn qorǵaǵan Aıdana Qaıken, Aqsý qalasynyń gımnazııa oqýshysy Jansaıa Jánibek, oblys ortalyǵyndaǵy gımnazııa-ınternat ókili Ramazan Dáýrenbekuly, Ekibastuzdaǵy №36 mektep-lıseıi úkilep qosqan Qazyna Tynybek jáne basqalar týǵan tilderin qudiret kórgen ór minezdi órender ekenderin kórsetti.
Taǵy bir baıqalǵany – «Muqaǵalı oqýlaryna» ózge ult ókilderiniń balalary, atap aıtqanda, oblys ortalyǵyndaǵy №3 gımnazııasynyń 8-synyp oqýshysy Darıa Langolf pen №8 lıseı-mektebiniń 8-synyp oqýshysy Ekaterına Sokolova qatysty.
Ortalyq mamandarynyń aıtýynsha, «Muqaǵalı oqýlarynyń» maqsaty – jas urpaqtyń ádebıetke, qazaq poezııasyna degen qushtarlyǵyn arttyrý, olardy óleń qudireti men qýatyn janymen sezinip, júregimen túsine bilýge úıretý.
Ekinshiden, elimizdegi mektep oqýshylary arasynda qazaq aqyndarynyń, Muqaǵalı Maqataevtyń da shyǵarmalaryn nasıhattaý, balǵyn talanttardyń shyǵarmashylyq qabiletterin, tabıǵı daryndaryn ushtaý bolyp tabylady.
Úshinshiden, jańadan óleń jazýǵa talpynyp júrgen oqýshylarǵa qoldaý kórsetip, olarmen júrgiziletin shyǵarmashylyq jumys túrlerin jandandyrý.
Oqýshylar «О́leń piri – Muqaǵalı» atalatyn negizgi bólim sharty boıynsha aqynnyń jyrlaryn jatqa oqyp berdi. Onyń ishinde aqynnyń óleńderimen birge «Aqqýlar uıyqtaǵanda» jáne «Raıymbek, Raıymbek!» sııaqty poemalary da bar. Aqıyq aqynnyń ómiri men shyǵarmashylyǵynan qanshalyqty habardar ekendikterin úmitkerler «Muqaǵalı jaıly kim kóp biledi?» degen bólimde 10 suraqqa jaýap berý arqyly baıqatty.
«Jaýqazyn jyr janymdy júr mazalap» degen bólimde qalamynyń jeli bar jetkinshekter ózderi jazǵan óleńderin de oqyp berdi. Qaýyrsyn qanat óleńder júrek terbep, sanaǵa túrli oı salady eken.
Qatysýshylar óleńniń ıdeıasyn ashyp, mánerlep, kórermenge áserli etip oqyp berýleri kerek. Qazylar alqasy oqýshynyń óleńdi mánerlep oqý sheberligine, dıksııasyna, daýys boıaýyna, ártistik qabiletine erekshe mán berdi.
Osyndaı talapqa oqýshylardyń arasynan Iаmyshev aýyly orta mektebiniń 11-synyp oqýshysy Aıkerim Haýmetqalı saı kelip, qatarynan qara úzip shyqty.
Al ony osy baıqaýǵa ázirlegen ustazy, qazaq tili men ádebıeti pániniń muǵalimi Tóleý Kaýkerdiń aıtýynsha, ata-anasy, mektebi úlken úmit kútetin Aıkerim óte talapty qyz. О́leń de jazady. Iаmyshtyń mektebinde táýelsizdikten keıin tarıhı otanyna oralǵan aǵaıyndardyń 80 balasy oqyp bilim alýda. Sóıtip «Muqaǵalı oqýlarynyń» oblystyq kezeńiniń qorytyndysy boıynsha bas júldeni Aıkerim Haýmetqalı ıelendi. Aıkerim endi Almaty oblysy, Raıymbek aýdany, Qarasaz aýylynda ótetin respýblıkalyq kezeńde synǵa túsedi.
Farıda BYQAI,
«Egemen Qazaqstan»
Pavlodar
