73 kılo salmaq dárejesinde beldesken qandasymyz bastapqy básekelerde gonkongtyq Kvok Vıng Lı, kolýmbııalyq Leıver Navarro jáne tájikstandyq Somon Mahamtbekovten basym túskenimen, tórtinshi kezeńde túrkııalyq Bilál Kıoloǵlyǵa jol berdi. Jubanysh básekesinde belgııalyq Málim Abdýl Ýmaevty jeńgen Janbolat qola medal úshin tartysta reseılik Davıd Samsonovqa san soqtyrdy. Dál osy salmaqta baq synaǵan Ańsarbek Ǵaınýllın alǵashqy kezdesýinde Adam Bıdzovskııdan utylyp, kórermender qataryna qosyldy.
66 kılo salmaq dárejesinde kúsh synasqan qazaqstandyq balýandar jeńis tuǵyryna kóterile almady. Baqytjan Ábdýrahmanov Domınıkan Respýblıkasy men Chehııanyń ókilderin utqanymen, ıtalııalyq Manýel Lombardoǵa jol berip, jubanysh básekesinde reseılik Murat Shopanovtan jeńildi. Sunǵat Jubatqan Vengrııa, Perý, Reseı dzıýdoshylaryn úılerine qaıtaryp, jartylaı fınalǵa birden joldama aldy. Biraq sodan keıin brazılııalyq Maıkl Marselıno men Reseı balýany Murat Shopanovtan utylyp, besinshi orynda qalyp qoıdy.
Qyzdar arasynda saıysqa túsken Jadyra Ámirtaeva men Merýert Sársenova (52 kılo) jáne Aıda Karchaevanyń (57 kılo) da joldary bolmady. Bul sportshylarymyz alǵashqy aınalymddardan asa almady.
Búgin túnde taǵy tórt salmaq dárejesiniń (81 kılo, 90 kılo – uldar, 63 kılo, 70 kılo – qyzdar) júldeleri sarapqa salynady. Bóriktiler saıysynda 90 kılo salmaqta Erasyl Bolat pen Dinahmet Rysymbek tatamıge shyǵady. Burymdylar arasynda 70 kılo salmaqtaǵy Móldir Narynovanyń ónerin tamashalaımyz. Odan keıingi kúnderi Nazerke Tileýhanova (78 kılo), Kamıla Berliqash (+78 kılo) jáne Sanjar Jabborov (+100 kılo) jarys kórigin qyzdyrady.
Ǵalym SÚLEIMEN,
«Egemen Qazaqstan»
