– Men sizdiń shyǵarmashylyǵyńyzben bala kezimnen tanyspyn. Sizdiń talantyńyzdy dáripteıtin adamdardyń birimin. Siz bizdiń, aǵalarymyzdyń kýmıri bolǵansyz. Sizdiń ánderińiz negizinen sol ýaqyttaǵy romantızmdi sıpattaıdy, ol kezderi jastar móldir, taza sezimderge, mahabbatqa toly bolatyn. Qorabaı aǵa, halyq sizdi sol úshin jaqsy kóredi, sizdiń ánderińiz qazaq radıosynyń altyn qorynda saqtalǵan, – dedi Erlan Qoshanov.
О́ńir basshysy jetpiske jasy jetken Qorabaı Ábikenulynyń ıyǵyna shapan jaýyp, syı-qurmet kórsetti.
Shyǵarmashylyq keshke ánshi Ǵalym Muhamedın, Qazaqstannyń eńbek sińirgen ártisi, ánshi Serik Ospanov, Qazaqstannyń eńbek sińirgen qaıratkeri Janǵalı Júzbaev jáne mereıtoı ıesiniń shákirti, ánshi Seıil Aıaǵanov syndy óner salasynyń maıtalmandary mereıtoı ıesine qoldaý-qoshemet kórsetip, kesh kórigin qyzdyrdy.
Qorabaı Esenov – Jańaarqa aýdanynyń týmasy. Ol óziniń sanaly ǵumyryn aýyl sharýashylyǵy salasyna arnaǵan jan. Eńbek jolyn týǵan aýylynda agronom bolyp bastap, uzaq jyldar Jańaarqadaǵy astyq qabyldaý beketi dırektorynyń orynbasary, aýdandyq aýyl sharýashylyq bóliminiń basshysy bolyp qyzmet etken. Naryq zamanynda óz aldyna jeke sharýashylyq quryp, kásipkerliktiń de tasyn órge domalatyp kele jatqan segiz qyrly, bir syrly jan. Sóıte júrip ol óziniń jan serigi – gıtarasyn qolynan astamaı, ónerge meılinshe adaldyq tanytyp júrgen shyǵarmashylyq ıesi.
Áýesqoı ánshi-kompozıtordyń on jeti jasynan shyrqaǵan «Jas qalam» áni ótken ǵasyrdyń 60-70-shi jyldary jastar arasynda erekshe tanymal bolǵan. Osy án arqyly ol búkil qazaq eline tanymal boldy desek, artyq aıtqandyq emes. Búginde qazaq radıosynyń altyn qorynda ánshi-kompozıtordyń 13-ten astam áni saqtalǵan.
Kesh ıesin elimizdegi bard mýzyka baǵytynyń negizin qalaǵan ónerpazdyń biri dep nyq senimmen aıtýǵa bolady. Kezinde elimizdiń osy saladaǵy tanymal tulǵasy, dara talant ıesi Tabyldy Dosymovtyń ózi Qorabaı Esenovti aýylyna arnaıy izdep baryp, batasyn alǵan.
Qaırat ÁBILDA,
«Egemen Qazaqstan»
QARAǴANDY
