«Elbasy halyqqa arnaǵan dástúrli Joldaýlarynda densaýlyq saqtaý salasyn nazardan tys qaldyrǵan emes. Memleket basshysy alǵashqy medısınalyq-sanıtarlyq kómektiń ásirese aýyldy jerlerge deıin qoljetimdi bolýyn qamtamasyz etý kerektigin aıtty. Iаǵnı, medısınalyq ortalyqtardyń tehnıkalyq bazasyn kóterip, dárigerlerdiń biliktiligin arttyrýymyz qajet. Jańa tehnologııany kóbeıtý, ýchaskelik dárigerlerdiń moınyna artylǵan júkti jeńildetý, sandyq tehnologııa jáne elektrondy júıege tolyqtaı kóshý arqyly elimizdiń medısınasy damı túsedi. Bul qadamdar aldaǵy ýaqytta telefonmen dárigerden keńes alýǵa jetýge jol ashady», – dedi taıaýda Túrkistan qalasyndaǵy birqatar emdeý mekemelerin aralap, tynys-tirshiligimen tanysqan Densaýlyq saqtaý mınıstri Eljan Birtanov.
Mınıstr osy saparynda joǵary medısınalyq kolledjdiń jumysymen tanysty. Elimizdegi eń úzdik kolledj atanǵan bilim ordasynyń tehnıkalyq bazasy zamanaýı qondyrǵylarmen tolyq jabdyqtalǵan. 1965 jyly negizi qalanǵan bilim oshaǵynda búginde 2,5 myńǵa jýyq stýdent bilim alýda.
Kezdesý barysynda aımaq basshysy Janseıit Túımebaev kolledj stýdentterin sapaly bilim alyp, aldaǵy ýaqytta Túrkistan qalasynda jańadan ashylatyn 8 birdeı medısınalyq mekemege jumys isteýge shaqyrdy. Mınıstr 2013 jyly ashylǵan 500 orynǵa laıyqtalǵan qalalyq emhanaǵa da at basyn burdy.Búginde emdeý mekemesindegi qyzmet kórsetý 100 paıyz sandyq júıege kóshken.
Eljan Birtanov isker basshy Muqan Egizbaev basqaratyn Túrkistan oblystyq densaýlyq saqtaý basqarmasy qoldanysqa engizgen osy júıeni elimizdegi ózge mekemelerge úlgi etý kerektigin jetkizdi. Iаǵnı, kelesi jyldan bastap, barlyq emhanalar men aýrýhanalar medısınalyq qujattardy qaǵazsyz, sıfrlyq nusqada júrgizýge kóshýge mindettelgen. Bul azamattardyń densaýlyq saqtaý kitapshalarynyń elektrondy nusqada jasaýǵa, emdeý mekemelerdegi uzyn-sonar kezekterdi joıylýyna, bıýrokratııadan arylýǵa, qyzmet kórsetý sapasyn arttyrýǵa múmkindik bermek.
Ǵalymjan Elshibaı,
«Egemen Qazaqstan»
