Aıtýly jyr dodasyna Qyrǵyzstan elinen Asylbek Maratov, Mýndýzbek Ýsýpbek, Mońǵolııadan Rashat Aıdos, Qýantqan Amanjol syndy júldeli júırikter kelse, elimizdegi tanymal aqyndar Aıbek Qalıev, Rınat Zaıtov, Muhtar Nııazov, Rústem Qaıyrtaı, Maqsat Aqanov, Dıdar Qamıev, Meıirbek Sultanhan jáne ózge de tanymal aqyndar qatysqan bolatyn.
Halyqaralyq dodaǵa aıtys aqyndary men jyrshy-termeshilerdiń halyqaralyq odaǵynyń tóraǵasy, aıtystyń aqsaqaly Júrsin Erman, Qazaqstan jazýshylar odaǵynyń tóraǵasy, aqyn Ulyqbek Esdáýlet, Qazaqstannyń halyq aqyny Ásııa Berkenova, «Aıqyn» gazetiniń bas redaktory Nurtóre Júsip, belgili ǵalym, alashtanýshy Dıhan Qamzabekuly jáne Túrkııadan kelgen ǵalym, Ábdýaqap Qara, Mońǵolııadan kelgen aqyn, Shynaı Rahmetuly qazylyq jasady.
Sonymen, Astananyń 20 jyldyǵyna oraı uıymdastyrylǵan aıtysqa kelgen 20 aqynnyń ishinen kelesi kúnge 12 aqyn sýrylyp shyqty.
Fınalda Aspanbek Shuǵataev pen Aıbek Qalıev, Rústem Qaıyrtaı men Maqsat Aqanov, Serik Qoıshyǵulov pen Asylbek Maratov, Meıirbek Sultanhan men Shuǵaıyp Sezimhan, Rınat Zaıtov pen Aıdos Rashat, Muhtar Nııazov pen Dıdar Qamıev aıtysty. Shyny kerek, ekinshi kúngi aıtys sál qysqalaý bolsa da birinshi kúngi aıtystan basym bolǵandaı. Aqyndar baryn saldy. Qazylar kóbine tolyq upaı kóterip otyrdy. Alty jup aıtys aıaqtaǵannan keıin qazylar aqyldasýǵa shyǵyp, osylardyń ishinen úzdik shyqqan Rınat Zaıtov pen Muhtar Nııazovty bas júlde úshin sheshýshi aıtysqa jiberdi.
Ekeýi de entikpegen eken. Naǵyz shappa-shap aıtys jasady. Shýlaǵan el birinen keıin birine aýnap zaldy jaryp keterdeı shatyrlatyp shapalaq soqty. Ol aıtys ta aıaqtady. Endigi másele – Bas júlde kimdiki? Bas báıgeniń júldesi – 7 000 000 teńge.
Shynynda qazylarǵa qatty soǵar másele. Osy tusta qazylardyń qasyna Mádenıet jáne sport mınıstri Arystanbek Muhamedıuly keldi. Taǵy da aqyldasty. Biraz sóılesip, bir sheshimge kelgendeı boldy.
Asylbek Maratov, Aıdos Rashat, Dıdar Qamıev, Shuǵaıyp Sezimhan, Aspanbek Shuǵataev syndy bes aqynǵa arnaıy júlde berilip 500 000 teńgeden syıaqy úlestirildi.
Júldeli úshinshi oryndy Aıbek Qalıev, Maqsat Aqanov, Serik Qoıshyǵulov ıelenip, ár qaısysy 1 000 000 teńgeden qanjyǵalady. Aıta keterligi, Serik Qoıshyǵulovqa berilgen júldeni Qazaqstan respýblıkasynyń mádenıet, sport jáne aqparat qyzmetkerleri salalyq kásipodaǵynyń tóraıymy Svetlana Imanqulova taǵaıyndapty.
Júldeli ekinshi oryndy Rústem Qaıyrtaıuly men Meıirbek Sultanhan ıelenip, ár qaısysy 2 000 000 teńgeden enshiledi.
Sóıtip, bul aıtysqa eki Bas júlde beriletin bolyp sheshim shyqty. Birinshi oryn joq, ekeýine de 7 000 000 teńgeden berdi! Naǵyz aıtystyń sharpysyn, naǵyz dodanyń tartysyn kórsetken eki aqynǵa birdeı júlde bergen qazylarǵa rıza kóńilmen qaıtqan aıtys súıer qaýymnyń qulaq quryshynda qalǵan aqyndar jyry kópke deıin umytylmastaı boldy.
Ularbek NURǴALYMULY,
«Egemen Qazaqstan»
