Mınıstr jumys sapary aıasynda Taldyqorǵan qalasynda jańadan salynyp jatqan mádenı nysandardyń qurylysymen tanysty. Sonyń biri – jaqyn kúnderi kóremenderge esik ashatyn qazaq drama teatrynyń ǵımaraty. Álemdik úlgide salynǵan mádenıet oshaǵy Jetisý ólkesindegi sáýletine saltanaty jarasqan biregeı teatr bolmaq. Qazir teatr ǵımaratynyń qurylysy tolyq aıaqtalyp, árleý jumystary júrip jatyr. Táýelsizdik kúni qarsańyńda ǵımarat paıdalanýǵa berilmekshi.
Munan keıin Arystanbek Muhamedıuly aımaqtyń zııaly qaýymy men sport sańlaqtary bas qosqan jıynǵa qatysyp, Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynyń basym baǵyttaryna toqtaldy.
– Elimizdi shırek ǵasyrdan astam ýaqyt aralyǵynda dúnıe júzine tanyttyq. Elbasymyzdyń sarabdal saıasatynyń arqasynda biz óz maqsatymyzdyń bıik mejesin baǵyndyrdyq. Jahandaný kóshinde kósh bastaǵan 50 memlekettiń ishine endik. Endi damyǵan elder sanatyna engen memlekettiń halqy da ál-aýqaty jaqsarǵan, turmys sapasy túzelgen el bolýy kerek. Sol úshin Memleket basshysy bıylǵy Joldaýyn jarııalady, – dedi mınıstr Saltanat saraıynda ótken jıynda.
О́z kezeginde sóz alǵan Almaty oblysynyń ákimi Amandyq Battalov óńirdiń mádenı ómirindegi jetistikter men ekonomıkalyq tabystaryna toqtalyp, Elbasy Joldaýy aldaǵy atqarylatyn iske zor jaýapkershilik júkteıtinin jetkizdi.
– Joldaýdy jetisýlyqtar úlken yqylaspen tyńdady. Bul – osyǵan deıin júzege asyrylyp jatqan strategııalyq bastamalardyń zańdy jalǵasy. Elbasy Joldaýynda berilgen árbir basymdyq halqymyzdyń ál-aýqatyn, turmys sapasyn arttyrýǵa baǵyttalǵan. Bul turǵyda oblys Memleket basshysynyń árbir mindettemesin zor yqylaspen oryndaıtyn bolady, – dedi aımaq basshysy.
Qalmahanbet MUQAMETQALI,
«Egemen Qazaqstan»
Almaty oblysy
