Qazan aıynyń 19 kúni Polshanyń bas qalasy Varshava shahary týrızmniń shynaıy ortalyǵyna aınalyp shyǵa keldi. Onyń sebebi sol kúni Varshavadaǵy «Ptak Warsaw Expo» kórme jáne kongress ortalyǵynda «World Travel Show» halyqaralyq týrıstik jármeńkesi óz jumysyn bastaǵan bolatyn. Osy oraıda iri masshtabtaǵy is-sharalardy ótkizýge arnaıy salynǵan atalǵan nysannyń Ortalyq Eýropadaǵy eń úlken kórme kesheni ekendigin aıtýǵa tıispiz. Shartaraptan jınalǵan júzdegen týroperatordyń, týrızm salasyna qajetti taýar óndirýshilerdiń basyn qosqan jármeńke «Jergilikti jáne sheteldik týrıstik salony», «Camper&Caravan» (avtoúıler) jáne «Varshava ıahta» salondary qurylymynda jumys jasaýda.
Polsha tarapynyń «World Travel Show» halyqaralyq týrıstik jármeńkesin udaıy ótkizýi kezdeısoqtyq emes. Sebebi Eýropanyń ortalyǵynda ornalasqan bul memleket týrızm salasyn qarqyndy damytý baǵytynda kóp jumys atqarýda. Qazir Polshada týrızm ındýstrııasy qalyptasqan dep aıtýǵa tolyq negiz bar. Eldiń atalmysh saladaǵy quzyrly sport jáne týrızm mınıstrliginiń keltirgen resmı málimetine sáıkes, búginde memlekettegi IJО́-niń 6%-y týrızm salasynyń úlesine tıedi eken. Ol degenimiz – júzdegen myń jumys oryndary.
Bıyl týrıstik salada ózindik orny bar, tórtinshi ret ótkizilip otyrǵan osy jármeńkede Qazaqstan pavılony ashylyp, sharaǵa qatysýshylar arasynda úlken qyzyǵýshylyq týǵyzdy.
Elimizdiń pavılonyna arnaıy kelgen Polsha Respýblıkasynyń sport jáne týrızm mınıstri Vıtold Banka Qazaqstannyń Polshadaǵy Tótenshe jáne ókiletti elshisi Marǵulan Baımuhanmen birge onyń lentasyn qııý rásiminde ulttyq taǵamdarymyzdan dám tata otyryp, pavılon jumysymen tanysty.
«Qazaq týrızm» ulttyq kompanııasynyń uıymdastyrýymen jáne Qazaqstannyń Polshadaǵy elshiliginiń qoldaýymen jumysyn bastaǵan otandyq pavılonnyń túpkilikti maqsaty – aıtýly halyqaralyq shara aıasynda elimizdiń týrıstik áleýetin sheteldikterge keshendi tanystyrý, keleshekte memleketimizge týrıster legin kóbirek tartý.
«World Travel Show» halyqaralyq týrıstik jármeńkesiniń kórnekti jerleriniń birinde oryn tepken Qazaqstan pavılonynda Polshamen, jalpy Eýropa elderimen tyǵyz jumys jasasyp kele jatqan 5 týrıstik operator kelýshilerge óz qyzmetterin tanystyrýda.
Qazaqstan úshin eýropalyq, onyń ishinde polıak týrısteriniń kóptep kelýi asa mańyzdy. Elimizdiń Polshadaǵy Tótenshe jáne ókiletti elshisi Marǵulan Baımuhan myrza Elbasynyń otandyq týrızm salasynyń damýyna aıryqsha nazar aýdaryp otyrǵanyn atap ótip, qazirgi ýaqytta salada úlken serpilistiń bar ekenin sóz etti. Elshiniń sózine qaraǵanda, ótken jyly elimizge kelýshi polıak azamattary úshin vızalyq rejimniń alyp tastalýy búginde oń nátıjesin berýde. Osy jyldyń birinshi jartyjyldyǵynda ótken jyldyń mejeli ýaqytymen salystyrǵanda elimizge kelýshi polıak týrısteriniń sany 27%-ǵa artqan. Sonymen qatar Eýropa qurlyǵynan kelgen týrısterdiń úshten bir bóligin polıak týrısteri quraǵan eken.
Shara aıasynda Qazaqstannyń týrıstik pavılonyn tamashalaýshylar bir sátke de úzilmedi. Kelýshiler arasynda oqýshy jáne stýdent jastardy, nemeresin ertken zeınettegi keıýanany, sheteldik týrıstik fırmalar ókilderi men jýrnalıster boldy. Jıyn barysynda solardyń birqataryn sózge tarttyq.
Sezary RÝDJINSKII, ardager jýrnalıst: Men ómir boıy saıahattap kele jatqan janmyn. Qazaqstan – úlken memleket. Sizderdiń elderińizdiń týrıstik áleýeti zor. Elderińizde zańǵar bıik taýlar da, ush-qıyry joq jazyq dala da bar. Sonymen qatar sizderde týrıster úshin qyzyqty bolatyn jerler jetip-artylady. Osy oraıda Qazaqstan tarapynyń mundaı sharalarǵa qatysyp, óz týrıstik múmkindikterin tanystyrýy asa qajet dep bilemin.
Mechıslav LAPANOVSKII, «REMIX S.A.» kompanııasy basshysynyń keńesshisi: Men óz ómirimniń bes jylyn Qazaqstanda ótkizgen adammyn. Memleketterińiz túrli beldeýler úılesken, tamasha qaıtalanbas tabıǵaty bar el. Biraq eýropalyq týrıster úshin bastysy jergilikti halyq, olardyń ulttyq mádenıeti men salt-dástúrleri qyzyqty bolmaq. Osy oraıda sizderde qazirgi Eýropada sırek kezdestiretin berik otbasylyq qundylyqtar jaqsy saqtalǵan. Qazaqstanda bir ret bolǵan adam ony áste esinen shyǵarmaıdy, únemi qaıta bolýǵa ańsary aýyp turady.
Týrıstik jármeńke aıasynda elimizdiń týrıstik áleýetin tanystyrýdan ózge «Qazaq týrızm» ulttyq kompanııasy men polıak týrıstik uıymy arasynda ózara yntymaqtastyq týraly memorandýmǵa qol qoıyldy. Atalǵan kelisim qos memlekettiń týrızm salasyn úılestirýshi ortalyq mekemelerine ózara aqparat jáne tájirıbe almasý, birlesken is-sharalar ótkizý, mamandardy oqytý men biliktiligin arttyrý syndy tyń múmkindikter bermek.
Jandos ÁÝELBEKULY,
«Egemen Qazaqstan»
Polsha
