Solardyń biri– «Royal Palace» qonaq úı jáne meıramhana kesheni. 3,5 myń sharshy metr aýmaqty alyp jatqan ekiqabatty eńseli ǵımaratty salýǵa jeke kásipker 600 mıllıon teńge qarajat jumsaǵan. Bankten alynǵan nesıeniń bir bóligi «Bıznestiń jol kartasy – 2020» memlekettik baǵdarlamasy arqyly «Damý» qory kepildendirgen.
«Nysannyń ekinshi qabatynda ákimshilik keńseler jáne 600 orynǵa shaqtalǵan toıhana bolady. Onyń ishi tehnıkalyq quraldarmen tolyq jabdyqtalyp, 4 led ekran qoıylady. Al birinshi qabatynda karaoke bar men qonaq úı ornalasady. Budan bólek 150 adamǵa arnalǵan kishi meıramhana da jurtshylyqqa qyzmet kórsetedi. Árleý jumystary tolyǵymen aıaqtalyp, jıhazdar ákelinýde», deıdi «Jolanov» JK jetekshisi Bekejan Jolanov.
«Green park» tańdaýly otbasylyq park oteli de kórshi elden keletin qonaqtardy qarsy alýǵa tas-túıin daıyn. Sán-saltanaty kelisken 9 úı 120-200 adamdy qabyldaı alady. Munda wifi jelisi jumys isteıdi. Bıyl qosymsha 2,5 myń sharshy metr jol tóselipti. Osyndaǵy haıýanattar baǵyna eki maral men eki qaban ákelinipti. Endi 3 monsha, jylytylatyn basseıin iske qosylady.
Osy nysannyń aýmaǵynda taǵy bir meıramhana turǵyzylýda. Onyń birinshi qabatynda 150, ekinshi qabatynda 300 adam tynyǵa alady. Osydan 34 jyl buryn paıdalanýǵa berilgen «Esil» meıramhanasy da kúrdeli jóndeýden ótip, adam tanymastaı keıipke engen.
О́mir ESQALI,
«Egemen Qazaqstan»
Soltústik Qazaqstan oblysy
