Jalpy otyrys Senatqa Shymkent qalasynan jańadan saılanǵan depýtattar – Nurlan Beknazarov pen Darhan Satybaldynyń Qazaqstan halqyna ant berý rásiminen bastaldy. Sodan soń jańa senatorlar óz ótinishteriniń negizinde Senattyń turaqty komıtetterine múshe bolyp saılandy. Atap aıtqanda N.Beknazarov palatanyń Konstıtýsııalyq zańnama, sot júıesi jáne quqyq qorǵaý organdary komıtetine, al D.Satybaldy Áleýmettik-mádenı damý jáne ǵylym komıtetine múshelikke ótti.
Jalpy otyrysta birinshi kezekte buǵan deıin Májilis maquldaǵan «2018-2020 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasy qaraldy. Bul qujat boıynsha baıandama jasaǵandardyń biri – Ulttyq ekonomıka birinshi vıse-mınıstri Rýslan Dálenov depýtattarǵa zań jobasynyń maqsat-mindetteri men talaptary týraly aıtyp berdi.
Onyń baıandaýynsha, 2018 jylǵa arnalǵan makroekonomıkalyq kórsetkishter boljamy naqtylanyp, negizgi ssenarııde 2018 jyly munaıdyń baǵasy barrel úshin 55 AQSh dollarynan 60 AQSh dollaryn deıin ulǵaıtylǵan. Al 2018 jylǵy nomınaldy IJО́ 58 242,9 mıllıard teńge kóleminde baǵalanyp, bul 2017 jylǵy sáýirde maquldanǵan kórsetkishten salystyrmaly túrde 1 036,2 mıllıard teńgege joǵary bolyp otyr.
Vıse-mınıstrdiń habarlaýynsha, basqa salalardaǵy ósim sol kúıinde saqtalǵan jáne ınflıasııa 5-7 paıyz deńgeıinde qalýy tıis.
Al Qarjy mınıstri Álıhan Smaıylov zań jobasy Memleket basshysynyń Shymkent qalasy men Túrkistan oblysynyń ákimshilik mártebelerin ózgertý týraly Jarlyǵyn iske asyrý úshin ázirlengendigin atap ótti.
Osyǵan baılanysty qujatta oblystan respýblıkalyq bıýdjetke keri transfert aýdarý jáne olardy transferttermen Shymkent qalasyna qaıta jiberý jolymen oblystyń sýbvensııalar kólemin bólý kózdelgen.
– Agroónerkásiptik keshen áleýetin iske asyrý maqsatynda 18,8 mlrd teńge, onyń ishinde keıinnen aýyl sharýashylyǵy tehnıkalary men jabdyqtaryn satyp alýdy kredıtteý úshin «QazAgro» ulttyq basqarý holdıngi» aksıonerlik qoǵamynyń jarǵylyq kapıtalyn ulǵaıtýǵa 15 mlrd teńge baǵyttaý usynylady. Sapaly jáne qoljetimdi turǵyn úı usyný sheńberinde salymshylarǵa aldyn ala jáne aralyq turǵyn úı qaryzdaryn berý úshin «Qazaqstannyń turǵyn úı qurylys jınaq banki» aksıonerlik qoǵamyn bıýdjettik kredıtteýge 15,0 mlrd teńge jumsaý usynylady, – dedi Á.Smaıylov.
О́z kezeginde Ulttyq bank tóraǵasy Danııar Aqyshev senatorlarǵa aqsha-nesıe saıasaty men qarjy naryǵyndaǵy jaǵdaı týraly túsinik berip ótti.
– 2018 jylǵy qańtar-qyrkúıek aılarynda ınflıasııa 3,3% boldy, bul ótken jyldyń uqsas kezeńinen tómen. Qyrkúıektegi jyldyq ınflıasııa ótken jyldyń sońyndaǵy 7,1%-ben salystyrǵanda 6,1%-ǵa deıin tómendedi. Ulttyq banktiń baǵalaýy boıynsha bıylǵy ınflıasııa 5-7% maqsatty dálizde qalady, al 2019 jyly ol 4-6% quraıtyn jańa tómen maqsattyq dálizdiń joǵary shekarasynda qalyptasýy kerek. Bolashaq ınflıasııanyń ósýine jol bermeý úshin Ulttyq bank
15 qazanda bazalyq stavkany 9%-dan 9,25%-ǵa deıin kóterý týraly sheshim qabyldady. Bazalyq stavkanyń jańa deńgeıi teńge aktıvterine suranysty arttyrady jáne qolaıly aqsha-kredıt jaǵdaılaryn saqtaýǵa múmkindik beredi. Jyldyń basynan bastap 24 qazanǵa deıin valıýta naryǵynda teńge baǵamy 10,1%-ǵa álsiredi jáne bir AQSh dollary úshin 365,82 teńgeni qurady, – dedi D.Aqyshev.
Atalǵan zań jobasyna baılanysty saýal bergen senatorlardyń biri Asqar Beısenbaev Ulttyq ekonomıka mınıstrliginiń ókilinen Túrkistan oblysynyń ortalyǵy Túrkistan qalasyna qyzmet aýystyrǵan memlekettik jáne azamattyq qyzmetkerlerdi baspanamen qamtý jaıynda surady. Bul saýalǵa baılanysty R.Dálenov elimizde jalpyǵa qoljetimdi
«7-20-25» baǵdarlamasynyń júzege asyrylyp jatqandyǵyn, oǵan qatysýshylardyń alǵashqy jarnasyn sýbsıdııalaý múmkindigi qaralyp jatqandyǵyn aıtty.
Memleket basshysynyń Joldaýyn el ishinde nasıhattap, negizgi basymdyqtaryn túsindirip oralǵan depýtattar jalpy otyrysta budan bólek Májiliste maquldanǵan «Halyqaralyq azamattyq avıasııaǵa qatysty zańsyz aktilermen kúres týraly konvensııany ratıfıkasııalaý týraly», «Qazaqstan Respýblıkasy men Qyrǵyz Respýblıkasy arasyndaǵy Qazaqstan-Qyrǵyz memlekettik shekarasyn shegendeý týraly shartty ratıfıkasııalaý týraly», «Qazaqstan Respýblıkasy, Túrikmenstan jáne О́zbekstan Respýblıkalary arasyndaǵy úsh memlekettiń memlekettik shekaralarynyń túıisý núktesiniń aýdany týraly shartty ratıfıkasııalaý týraly», «Qazaqstan Respýblıkasynyń Úkimeti men Úndistan Respýblıkasynyń Úkimeti arasyndaǵy Birikken Ulttar Uıymynyń Lıvandaǵy ýaqytsha kúshterindegi (BUULÝK) úndistandyq batalon quramynda qazaqstandyq bitimgershilik kontıngentti birlesip óristetý tártibi týraly ózara túsinistik týraly memorandýmdy ratıfıkasııalaý týraly», «Qazaqstan Respýblıkasynyń keıbir zańnamalyq aktilerine jarnama máseleleri boıynsha ózgerister men tolyqtyrýlar engizý týraly», «Qazaqstan Respýblıkasynyń keıbir zańnamalyq aktilerine statıstıka máseleleri boıynsha ózgerister men tolyqtyrýlar engizý týraly» zań jobalaryn qabyldady.
Osy arada atap óterligi, tıisti zań jobasy boıynsha baıandama jasaǵan Qorǵanys mınıstriniń orynbasary Talǵat Muhtarov Qazaqstan men Úndistan arasyndaǵy joǵaryda atalǵan memorandýmǵa 2018 jylǵy 21 tamyzda BUU-nyń mıssııalaryna qatysýǵa Qazaqstan Qarýly Kúshteriniń áskerı qyzmetshilerin jiberý týraly Qazaqstan Parlamentiniń 2018 jylǵy 15 maýsymdaǵy qaýlysyn júzege asyrý maqsatynda qol qoıylǵandyǵyn atap ótti.
– Qujatta bitimgershilik kontıngentti birlesip óristetý, atap aıtqanda, qolbasshylyq etý jáne basqarý, qarjylyq jáne medısınalyq qamtamasyz etý, sondaı-aq jeke quramdy daıarlaý tártibi aıqyndalǵan. Qazaqstan Qarýly Kúshteri Lıvanda 1978 jyldan bastap óristetilgen úndistandyq bitimgershilik kontıngentiniń qaramaǵyna 120 áskerı qyzmetshiden turatyn rotany usynady, – dedi T.Muhtarov.
Onyń aıtýynsha, bizdiń áskerı qyzmetshilerge Lıvanda jergilikti jerdi qaraýyldaý, baqylaý beketterin uıymdastyrý, oq atýdyń toqtatylýyn saqtaýdy baqylaý, jergilikti ahýaldy taldaý jáne baǵalaý, Lıvannyń qarýly kúshterine tıisti kómek kórsetý jumystary mindetteledi.
Sońynda birqatar senatorlar ortalyq jáne atqarýshy organdardyń basshylaryna depýtattyq saýaldaryn joldady.
Serik ÁBDIBEK,
«Egemen Qazaqstan»
