Osyǵan oraı E.О́mirzaqov atyndaǵy oblystyq fılarmonııada eske alý keshi ótti. Onda jınalǵan jurt aldymen telejýrnalıst Gúljibek Baekenova jasaǵan, «Kamshat Donenbaeva: Iа k tebe prıshla, pole!» atty derekti fılmdi tamashalady. Fılmde qarapaıym eńbek adamynan qoǵam qaıratkerligine deıin kóterilgen, qazaqtyń maqtanyshy Kámshat Dónenbaevanyń ómir joly aıshyqty baıandalady. Munan keıin oblys ákimi Arhımed Muhambetov Kámshat apamyzdyń eńbek joly da, ómir joly da jas urpaqqa úlgi-ónege ekenin aıtty.
«Kámshat Baıǵazyqyzynyń oramaly qandaı aq bolsa, kóńili de, júregi de sondaı appaq adam edi. Ol aýyryp júrgenniń ózinde oblystaǵy qoǵamdyq jumystardan qalmaı qatysyp otyrdy. Bárimiz de bala kezden onyń atyna qanyq boldyq. Men oblysqa 2015 jyly qyzmet babymen kelgen kezde, aldymen apamyzǵa sálem berip, batasyn alǵan edim. Ol tek oblystyń ǵana emes, elimizdiń maqtanyshyna aınaldy. Kámshat Baıǵaqyzyn máńgi este qaldyrý úshin oblysta birshama ister jasaldy. Kósheniń aty berildi, jaqynda músini qoıylatyn gúlzar ashylady, kolledj Kámshat apamyzdyń atymen atalady, Kachar kentindegi meshit te Kámshat ana atynda», dedi Arhımed Begejanuly.
Keshke Almatydan arnaıy kelgen Sosıalıstik Eńbek Eri, memleket jáne qoǵam qaıratkeri Vera Sıdorova tebirene sóıledi.
«Kámshattyń eńbek etken jyldarynyń, depýtat bolǵan keziniń kýágerimin. Men ol kezde aýdandarda basshylyq qyzmette boldym. Kámshat eńbektiń, onyń ishinde aýyl sharýashylyǵyndaǵy aýyr eńbektiń bedelin kótergen adam. Traktor aıdaý áıel adamǵa eshqandaı ońaı jumys emes edi. Kámshattyń ún qatýymen elde qyzdar traktorǵa otyra bastady. Sonda partııanyń oblystyq komıtetiniń hatshysy habarlasty, «nege qyzdar traktorǵa otyrmaı jatyr, az ǵoı?» deıdi. Sonda men álgi kisige: «Siz óz qyzyńyzdy traktorǵa otyrǵyzar ma edińiz?» degen edim, ol únsiz qaldy, – dedi Vera Vasılevna.
Keshte estelikterden qurastyrylǵan «Kámshat» atty kitaptyń tusaýkeseri ótti. Ony Kámshattyń kelini Aqmaral Jaqsybaeva, qazaq redaksııasyn jýrnalıst Qydyrbek Qıysqan, orys redaksııasyn baspager Valentına Zaharchenko jasady. L.Tostoı atyndaǵy ámbebap kitaphana Kámshat Baıǵazyqyzy týraly maqalalar shyqqan ár jyldarǵy buqaralyq aqparat quraldarynyń kórmesin uıymdastyrdy.
Keshte Kámshat apaıdyń tek eńbek adamy, qoǵam qaıratkerligi ǵana emes, ol kisiniń ımandylyqty tý etip ustaǵan, otbasynyń uıtqysy bolǵan adamgershiligi de sóz boldy.
«Kámshat sonsha dańqqa bólense de qarapaıymdylyǵynan asyp ketken joq. Bir adamnyń aldynan kesip ótpeıtin. Namazyn qaza etken joq. Qajyǵa baryp kelgende basynan ótken ǵajap oqıǵany aıtyp edi. Mekkede júrgende bir quıyn turady da, Kámshattyń basynan jaýlyǵyn alyp ketedi. Kámshat: «Bul ne boldy? Endi jalańbas qalaı júremin, Allaǵa ne jazdym eken?» dep qamyǵyp turǵanda, sálden soń taǵy bir ret quıyn kóteriledi de, Kámshattyń jaýlyǵyn qaıta ákelip tastaıdy». Kámshat Allanyń súıgen quly dep bilemin» dedi oblystyq ardagerler keńesiniń tóraǵasy Kenjebek Úkın.
Keshte Kámshat apaǵa arnalǵan qos ánniń de tusaýy kesildi. Sonymen qatar I.Omarov atyndaǵy oblystyq qazaq drama teatrynda júrip jatqan Aqylbek Shaıahmettiń pesasy boıynsha qoıylǵan «Eńbek erleri» atty spektaklinen úzindi kórsetildi.
Keshten keıin as berilip, Kámshat apaǵa rýhyna quran baǵyshtaldy.
Názıra JÁRIMBET,
«Egemen Qazaqstan»
Qostanaı
