Olardyń ekeýi –Qyzyljar óńiriniń ókilderi. Agroforýmda Elbasynyń tapsyrmasyna oraı eńbek ónimdiligin arttyrý jáne aýyl sharýashylyǵynyń qaıta óńdelgen ónimderiniń eksportyn ulǵaıtý máseleleri qaraldy. Oǵan úlgili sharýashylyqtar shaqyryldy. Oblys aýmaǵynda jumys isteıtin «Atameken-Agro» JShS-i sıfrlandyrýdyń ozyq tehnologııalaryn keńinen qoldanyp keledi. Nátıjesinde seriktestikte eńbek ónimdiligi sońǵy 4 jylda 2 ese artty. Osyndaı joǵary jetistikteri úshin «AО́K-tegi sıfrlandyrýdyń kóshbasshysy» nomınasııasyna laıyq dep tanyldy.
Taǵy bir bas júlde bilikti dıqan Seıilbek Mahmetovke tapsyryldy. Aıyrtaý aýdanyndaǵy «Babyq-Burlyq» seriktestigi «AО́K ónimi óndirisiniń rekordshysy» ataǵyna ıe boldy. Bıyl munda jekelegen tanaptarda bıdaıdyń rekordtyq kórsetkishi jańartylyp, gektar berekeligi 62,5 sentnerden aınaldy. Sharýashylyq boıynsha ortasha ónimdilik 40 sentnerdi qurady.
«Babyq-Burlyqtyń» basshysy Seıilbek Mahmetov– oblystaǵy úlgi tutarlyq azamattardyń biri. Tómengi burlyq aýylynda turǵyndarǵa barlyq jaǵdaı jasalǵan. Ortasha eńbekaqy– 141 myń teńge. Úılerge ortalyqtandyrylǵan jylytý júıesi tartylǵan . Kelesi jyly jumysshylarǵa arnap baspanalar salynady.
О́mir ESQALI,
«Egemen Qazaqstan»
Soltústik Qazaqstan oblysy
