Jaýapty mamandar qazirgi kezde kólik salasynda ashyq naryqtyq mehanızmderdiń jumys isteı bastaǵanyn aıtady. Jyljymaly sostavty jańartyp, arnaıy jolaqtar ashýdyń arqasynda qalada jolaýshylar aǵyny edáýir artqan.
– Eski ári tútin shyǵaratyn avtobýstar qalada júrýge tıis emes. Eger kórsetilgen qoldaýǵa qaramastan jeke tasymaldaýshy jyljymaly sostavty jańalamasa, onda olarmen kelisim buzylady. Jańa tehnologııalardy engizip, bolashaqta bir kólikten ekinshisine tegin aýysýdy qarastyrǵan jón. Jolaýshylardyń kólik jumysyna qanaǵattanýy – tasymaldaýdyń basty krıterııi. Jeke kólikti qazirgi deńgeıde ustap turý úshin laıyqty balama usyný qajet, – deıdi megapolıs basshysy Baýyrjan Baıbek.
Syıymdylyǵy úlken jańa avtobýstar №48 baǵyt boıynsha júredi, sonymen qatar qaladaǵy № 12, 19, 56, 70, 77, 123, 124, 137 baǵyttar kúsheıtiletin bolady. Al, № 36, 51, 125 baǵyttaǵy eski gazelder jańa avtobýstarǵa almastyrylmaq. Atalǵan qoǵamdyq kólikter qozǵalysy shekteýli jandar úshin qolaıly ári tar kóshelermen de erkin júre alady. Bulardan ózge, № 59, 69, 71 baǵyttardaǵy jyljymaly sostav tolyq jańarady.
№205 baǵyt boıynsha jańa magıstraldy qozǵalys ashylady, ol Raıymbek dańǵyly boıymen «Barlyq» bazarynan qalanyń batys jaǵyn jáne «Jetisý» bazarynyń shyǵys jaǵyn qamtymaq. Bul baǵyt boıynsha jolaýshylarǵa jańa 20 avtobýs qyzmet kórsetedi. Almaty aglomerasııasy boıynsha jolaýshylardy tasymaldaý sapasyn arttyrý úshin Qaskeleń qalasyna qatynaıtyn uzyndyǵy 12 metrli avtobýstar júretin jańa baǵyt ashý isi josparda bar.
Aıta keterligi, Almatyda jyl aıaǵyna deıin jańa qoǵamdyq kóliktiń úlesi 87 prosentke deıin jetedi dep kútilýde.
Arman OKTIаBR,
«Egemen Qazaqstan»
ALMATY
