Forým Azııa men Eýropa elderiniń arasynda dıalog alańyn qurý arqyly sıfrlyq transformasııa, elektrondy úkimet, tehnologııalyq kásipkerlik jáne tórtinshi ındýstrııalyq revolıýsııa ıdeıalaryn damytý maqsatynda uıymdastyrylmaq. Sharaǵa halyqaralyq IT-qoǵamdastyqtardyń basty ókilderi, tehnologııa salasyndaǵy tanymal sarapshylar, kásiporyn basshylary, sıfrly jobalar salasynyń kásibı mamandary, ǵalymdar, ınvestorlar qatysady. Bul týraly Aqparat jáne kommýnıkasııalar vıse-mınıstri Dınara Sheglova aıtty.
«Búgingi tańda forýmǵa 23 memle-ketten 600-den astam qatysýshy, 50-ge jýyq spıker keledi dep kútýdemiz. Olardyń qatarynda Sıngapýr, Koreıa, Nıderlandy, Estonııa, Fransııa, Germanııa memleketteriniń ókilderi bar», dedi vıse-mınıstr.
Forým aıasynda sıfrlandyrý salasyndaǵy Qazaqstannyń alǵashqy premııasy – Digital Bridge Awards beriletin bolady. Atalaǵan syılyq «Úzdik sıfrly bastama», «Úzdik sıfrly keńse», «Úzdik IT-kompanııa» nomınasııalary boıynsha úzdikterdi anyqtaıdy.
Sonymen qatar forým barysynda elimizdiń startap-ındýstrııasyndaǵy mańyzdy shara – Astana Hub IT-startaptar halyqaralyq tehnoparkiniń tusaýkeseri ótedi.
«Biz forým aıasynda dıalog alańyn quryp qana qoımaı, álem nazaryn Qazaqstandaǵy qazirgi tańda júzege asyp jatqan sıfrly bastamalar men jobalarǵa burǵymyz keledi. Sondyqtan Digital Bridge – jyl saıyn ótkizý josparlanyp otyrǵan irgeli sharalardyń biri. Bul forým barysynda halyqaralyq Astana Hub IT-tehnoparkiniń tusaýkeseri ótedi. Shara kezinde Astana Hub-tyń negizgi ónimderi tanystyrylyp, baǵdarlamanyń alǵashqy túlekteriniń jetistikteri jáne EKSPO pavılondarynyń birinde ornalasqan tehnopark ınfraqurylymy kórsetiledi», dedi Dınara Sheglova.
Oǵan qosa bul kúni Astana Hub taǵy eki debıýttyq shara ótkizetin bolady: Astana Hub Awards jáne Astana Hub Battle. Aıta keteıik, Astana Hub-tyń tusaýkeseri jabyq formatta ótedi, oǵan Qazaqstannyń jáne basqa elderdiń resmı ókilderi, halyqaralyq ınnovasııalyq ekojúıeniń sarapshylary qatysatyn bolady. Al Digital Bridge forýmynyń qatysýǵa nıettiler úshin esigi ashyq.
Qarlyǵash QURAMYS,
«Egemen Qazaqstan»
