Elge el qosylsa qut. Áıtpese, kenttiń tirshiligi biraz ýaqyt buryn júdeý edi. Kezinde alyp stansamen birge salynǵan kópqabatty úıleri bos qalǵan-dy. Qazir júdeý tirshilikke reń berip, óndiristi kenttiń kelbeti ózgere bastady. Turǵyndardyń deni elektr stansasynda eńbek etýde. Budan basqa, birneshe sharýa qojalyǵy, shaǵyn jáne orta bıznes nysandary bar.
Kent ákimi Marjan Alshynbaevanyń aıtýynsha, kenttiń byltyrdan beri jeke bıýdjeti bar. Iаǵnı, 4-shi deńgeıli bıýdjet arqyly salyqtan túsken qarjyǵa kent qaýymdastyǵymen aqyldasa otyryp, ishki joldardy jóndeý, saıabaqtar otyrǵyzý qolǵa alynýda. Turǵyndar kentke kireberis joldyń jóndelýin kútýde. Joba-josparlar da jeterlik.
Byltyr GRES-2 stansasy kenttiń 60 jyldyǵyna balalar alańyn ornatyp, jaqsy syılyq jasap beripti. Turǵyn úıler de qalpyna keltirilýde. Bos qalǵan páterler jóndeýden ótkizilip, 45 otbasy kiltterin endi alady. Bul páterler Ekibastuz qalasynyń menshigine ótken. Eger qalǵan úıler jóndelse, bul úıdegi páterlerge taǵy 200-deı adam qonystanbaq.
Jalpy, kentte negizinen óz ultymyz kóp, sondaı-aq 1880 orys, 141 ýkraın, 82 nemis, 79 tatar, 41 belarýs, 5 cheshen halqynyń ókilderi turady. Sonymen birge О́zbekstannan elge oralǵan 24 otbasy qonystandy. Kósh áli jalǵasýda. Mysaly, 3 balasy bar Asqarbek Muhamedov Túrkistan oblysynyń Arys qalasynan «Nátıjeli jumyspen qamtýdy jáne jappaı kásipkerlikti damytý» baǵdarlamasy boıynsha kóship kelipti. Ol stansaǵa gaz-elektrmen dánekerleýshi bolyp jumysqa turdy.
Kent kóshelerine kórik bergen «Altyn adam», «Barys», «Jońǵar men qazaqtyń jekpe-jegi», «Qarakereı Qabanbaı», «Shapyrashty Naýryzbaı» músinderiniń avtory, músinshi, sýretshi, qolónershi Erkinjas Muhamedjanovpen jolsapar barysynda tanysqanbyz. Mektep oqýshylary, aýyl balalary sýret ónerine beıimdelip, músin ónerin úırenýde. Erkinjas ta – shetten kóship kelgen aǵaıynnyń biri.
Bul kúnderi qazaq tilinde bilim beretin mektepte 400-deı oqýshy, orys tilindegi mektepte 366 oqýshy bar. Orys mektebinde 130-ǵa jýyq qazaq balasy oqyp júrse, 1-5 jastyń aralyǵynda 400-ge tarta kishkentaı ósip keledi.
Al turǵyndar jańa mekteptiń ashylýyn asyǵa kútip júr. Bıyl mamyr aıynda bastalǵan qurylysty jergilikti «Stalmontaj» JShS merdiger kompanııasy qolǵa alypty. Joba boıynsha mektep 2019 jyldyń shilde aıynda paıdalanýǵa berilmek. Sóıtip, kelesi jańa oqý jylyn Solnechnyı kentiniń 400-den astam oqýshysy jańa mektepte oqıdy. Sport stadıony salynady. Mekteptiń qurylysyna 1,2 mlrd teńge bólingen. Abaı atyndaǵy jalpy bilim beretin mektep dırektory Aıman Kenjebaevanyń aıtýynsha, aldaǵy ýaqytta kenttiń jalpy bilim berý mektebinen kópsalaly mektep-gımnazııa sanatyna aýystyrý jospary da bar.
Mektep qurylysymen Ekibastuzǵa jańadan ákim bolyp taǵaıyndalǵan Nurjan Áshimbetov te tanysyp qaıtty. Kásiporynnyń atqarýshy dırektory Vıacheslav Vdovydchenkonyń málimetinshe, qazir mekteptiń birinshi qabaty daıyn. Ekinshi qabatta terezelerdi ornatý, santehnıkalyq jáne elektrmontajdaý jumystary júrgizilýde. Qurylys materıaldarynyń barlyǵy ekibastuzdyq kásipkerlerden jetkizilýde. Qurylys basynda mamandarmen birge jergilikti turǵyndar da eńbek etýde.
Farıda BYQAI,
«Egemen Qazaqstan»
Pavlodar oblysy, Ekibastuz qalasy, Solnechnyı kenti
